“НОК-ын үхмэл шийдвэрээс болж иргэд чирэгдэж байна”

Шинжилгээний цэгүүд энэ сар эхэлснээс хойш ачаалалд дарагдсан хэвээр байна. Шинжилгээний бүх цэгүүдийн гадаа иргэд бөөгнөрч, урт дараалал болон зогсож ажлаа чирэгдүүлэн бухимдацгааж байна. Өнөөдрийн байдлаар УБ хотын хэмжээнд 11 цэгт PCR шинжилгээ авч байна. НОК-оос шинжилгээ авах цэгүүдэд “цаг авсан иргэдээс шинжилгээ ав” гэх чиглэл өгчээ. Шинжилгээ өгөх хүмүүс цаг авах гэтэл “цаг дүүрсэн” учир яаралтай ажилтай хөдөө орон нутаг явах иргэд ажлаа алдаж чирэгдэж байна. Мөн цаг авсан иргэдээс гадна “зайлшгүй” буюу буяны ажилд, эмнэлгийн үйлчилгээ, жирэмсэн, гуравдугаар шатлалын хагалгаанд орох иргэдээс шинжилгээ авч байгаа юм. Харин хөдөө орон нутаг зайлшгүй шаардлагаар явах тодорхойлолттой, зөвшөөрлын бичигтэй иргэд шинжилгээний цэгүүдэд их байна. Энэ тохиолдолд шинжилгээний цэгийнхэн НОК-оос асууя гэх хариултыг өгч оруулахгүй байгаа юм. Тодорхойлолт албан зөвшөөрөлтэй олон зуун хүнийг НОК-оос асуух шаардлагатай, НОК утсаа авахгүй байна гэх өрөвдөлтэй хариултыг шинжилгээ авч байгаа эмч ажилтнууд яриад зогсож байна.Бид энэ асуудлаар НОК-оос тодруулах гэсэн боловч НОК-ын хэвлэлийн ажилтан Нийслэлийн Эрүүл мэндийн газраас тодруул гэх хариултыг өгсөн юм. Харин Нийслэлийн Эрүүл мэндийн газрын дарга Бямбадоржоос тодруулах гэсэн боловч “завгүй байна” гэх хариултыг өглөө. Өнөөдрийн байдлаар шинжилгээ өгөхөөр зогсож байгаад коронавирусын халдвар илэрвэл гайхах зүйлгүй толгой дохин эвлэрэхээр иргэдийг бөөгнөрүүлж, туйлдуулж байна.