НДШ-ийн нэмэгдлийн эсрэг хамтарсан ажлын хэсэг байгууллаа

Өнөөдөр /2021.02.25/-нд Хөдөлмөр нийгмийн зөвшлийн гурван талт Үндэсний хорооны ээлжит хурал ХНХ-ын яамны байранд боллоо. Тус хуралд МҮЭ-ийн холбооны Ерөнхийлөгч Х.Амгаланбаатар, МАОЭНХ-ны гүйцэтгэх захирал Х.Ганбаатар, ХНХ-ын сайд А.Ариунзаяа зэрэг холбогдох хүмүүс оролцсон байна.

Энэ үеэр Нийгмийн даатгалын шимтгэлийн нэмэгдлийн асуудлаар талууд байр сууриа илэрхийлж, НДШ-ийн асуудлаар санал боловсруулах үүрэг бүхий гурван талын хамтарсан ажлын хэсэг байгуулах шийдвэрт хүрчээ. 
Энэ үеэр ХНХ-ын сайд А.Ариунзаяа “МҮЭ-ийн холбооноос ирүүлээд байгаа НДШ-ийг нэмсэн шийдвэрийн хүрээнд тавьсан хүсэлтийг судалж үзээд ирэх оны нэгдүгээр сарын 1-н хүртэл хуулийн хэрэгжилтийг хойшлуулах гарц гаргалгаа байгааг судаллаа. Нийгмийн түншлэлийн хүрээнд МҮЭ-ийн холбоо болон МАОЭНХ хамтран зөвшилцөж ажлын хэсэг байгуулж холбогдох шийдвэрийг УИХ, Засгийн газарт хүргүүлнэ. “Хуулийн томьёоллын хувьд аливаа хууль гартал хуулийг царцаах гэсэн томьёолол байж болдоггүй учраас 2022 оны нэгдүгээр сарын 1-н хүртэл дээрх хуулийг хойшлуулъя. Хоёрт 2021 оны нэгдүгээр сарын 1-нээс төсөвт болон орон нутгийн өмчит газрууд НДШ төлөх хууль нь хэрэгжээд явж байгаа учраас одоо төлөөд явж байсан нь зүйтэй, энэ асуудлыг нөхөж олгох гэдэг агуулгаар биш харин дараа сар луу шилжүүлэх агуулгаар гэдэг байдлаар хуулиар хэлэлцүүлгээр шийдвэрлэх боломжтой юм” хэмээсэн байна.
МҮЭ-ийн холбооны Ерөнхийлөгч Х.Амгаланбаатар “МҮЭ-ийн холбооноос Нийгмийн даатгалын шимтгэлийн нэмэгдлийн суудлыг 2017 оны гуравдугаар сарын 5-ны өдөр ОУВС-гийн өргөтгөсөн санхүүжилтийн хөтөлбөрт хамрагдах шийдвэрийг гаргасан. Тус хөтөлбөрийг хэрэгжүүлэхтэй холбогдуулан Монгол Улсын Засгийн газар ОУВС-гийн өмнө долоон төрлийн татварыг нэмэгдүүлэх үүргийг хүлээсэн. Үүн дотор тэтгэврийн даатгалын санг бүдрүүлэх НД-ын шимтгэлийг нэмэгдүүлэх шийдвэр гарсан. МҮЭ-ийн холбооноос улс орны эдийн засаг хүнд үед аливаа татвар шимтгэлийн нэмэгдүүлэх асуудлыг цаг үеэ олоогүй шийдвэр байна гэж үзээд ОУВС-нд дээрх долоон төрлийн татварын дөрвөн төрлийг нь тодорхой хугацаагаар хойшлуулах хүсэлтийг өгсөн. НДШ-ийг 2019 онд нэмэгдүүлэх үед бид Засгийн газрын байр сууринд хүндэтгэлтэй хандсан. 2020 онд нөхцөл байдал цар тахлын улмаас хүндэрсэн учраас МҮЭ-ийн холбоо болон МАОЭНХ-ноос НДШ-ийг нэмсэн асуудалд байр сууриа илэрхийлж хамтын үйл ажиллагаа явуулж төсвийн хүрээнд НДШ-ийг нэмэгдүүлэх шийдвэрийг хойшлуулсан. Энэ онд нэмэгдэх НДШ-ийн хоёр хувийн нэмэгдлийг МҮЭ-ийн холбоо болон МАОЭНХ-ноос цаг үеийн нөхцөл байдалтай уялдуулан нэмэгдүүлэх боломжгүй гэдэг байр суурийг ХНЗ-ийн гурван талт Үндэсний хороонд уламжилж байна. НД-ын багц хуулийн УИХ-ын хаврын чуулганаар хэлэлцүүлэх, одоо хэрэгжиж байгаа хуулийг царцаах хүсэлтэй байна. Энэ хүрээнд МҮЭ-ийн холбооны аймаг нийслэлийн 22, мэргэжил үйлдвэрлэлийн 14 холбооны 450 мянган гишүүдийн санал хүсэлт гэдгийг хэлмээр байна” хэмээжээ.