Б.Баатархүү: Талийгаачдын амь насаа алдсан хэргийг шалгаж байгаа, шаардлагатай тохиолдолд олон нийтэд мэдээлнэ

Монголын сагсан бөмбөгийн түүхэнд нөхөж баршгүй гарз тохиож Монголын сагсан бөмбөгийн дээд лигийн тамирчин И, "Отгонтэнгэр Их Сургууль"-ийн сагсан бөмбөгийн тоглогч Ц нар зуурдаар таалал төгссөн харамсалтай хэрэг 2021 оны 02 дугаар сарын 07-ны өдөр гарсан юм. 

Уг хэргийн талаар ЦЕГ-ийн Хэвлэл мэдээллийн төвийн дарга, дэд хурандаа Б.Баатархүү мэдээлэхдээ: БЗД-ийн 25 дугаар хорооны нутаг дэвсгэрт хүн нас барсан гэсэн дуудлага мэдээлэл эрүүл мэндийн байгууллагад 2021.02.07-ны шөнийн 03:00 цагт ирсэн. 23 настай Ц гаднын нөлөөтэй, 20 настай И өндрөөс унасан байдалтай амь насаа алдсан нөхцөл байдал нь хэргийн газрын үзлэгээр тогтоогдож байгаа юм. Уг хэргийн талаар хэвлэл мэдээллийн байгууллагаар ташаа мэдээлэл их явж байна. Хэвлэл мэдээллийн байгууллагаар явсан мэдээлэл Цагдаагийн байгууллагаас алдагдсан байж болно. Талийгаачдын амь насаа алдсан шалтгаан шүүх шинжилгээний дүгнэлтээр тогтоогдоно. Шүүх шинжилгээний дүгнэлт 21 хоногийн дараа гарна. Цагдаагийн байгууллага уг хэрэгт хэрэг бүртгэл нээгээд явж байгаа, хэргийг хуулийн хугацаанд шалгаж шийдвэрлэнэ. Хэрвээ шаардлагатай тохиолдолд прокурорын зөвршөөлтэйгээр олон нийтэд мэдээлэх болно гэж мэдээллээ.