Ирланд улсад халдлагад өртсөн монгол эмэгтэй нас баржээ

Өнгөрөгч нэгдүгээр сарын 20-ны оройн 21:30 цагийн үед Ирланд улсад амьдардаг монгол эмэгтэй  Дублин хотын төв гудамжинд ажлаа тараад харьж явахдаа дээрэмдүүлж, хүзүүндээ хутгалуулсан талаар олон мэдээллийн хэрэгслээр мэдээлж байсан. Өмнө нь хэд хэдэн удаа дээрмийн хэрэгт холбогдож байсан 14 настай этгээд нь тус улсад нөхөр, хүүхдийн хамт амьдардаг 48 настай монгол эмэгтэй У-г дээрэмдэхийг завдаж, хохирогчийн хүзүүнд хутгалсан юм.  

Тэрбээр эмнэлэгт эмчлүүлж байсан ч харамсалтай нь шархаа даалгүй нас барсан байна. Монгол Улсаас Ирланд улсад суугаа элчин сайд Н.Тулга эмгэнэл илэрхийлж "Ирландын Дублин хотноо гэр бүлийн хамт амьдарч байсан Монгол Улсын иргэн 2021 оны  хоёрдугаар сарын 3-ны өдөр гэмт халдлагын улмаас амь насаа алдаж нөхөж баршгүй хүнд гарз тохиолдсонд талийгаачийн гэр бүл, үр хүүхэд, ах дүү, ураг төрөл болон найз нөхөд, Ирланд дахь монголчуудад гүн эмгэнэл илэрхийлье” хэмээжээ.