Европын холбоо Их Британи руу вакцин нийлүүлэхийг түр зогсооно

"The Independent”  мэдээллэхдээ Европын холбооны удирдлагууд “Pfizer”, “BioNTech” компаниудын вакцины экспортыг түр зогсоох яаралтай арга зам хайж байгаа юм байна.

Британи-Шведийн хамтарсан “AstraZeneca” компанийн эхлүүлсэн “Вакцины дайн”-ы улмаас ийм арга хэмжээ авахаар шийджээ. Тус компани нь Европын холбоо руу вакцин нийлүүлэхээ элдэв шалтаг тоочин хойшлуулж эхэлсэн атлаа Их Британи руу вакцин олон тоогоор гаргасан хэвээр байсан юм. Тайлбар шаардахад Их Британи нь Европын холбооноос урьтаж захиалга өгсөн болохоор нийлүүлж байгаа хэмээжээ. Мөн компанийн Ерөнхий захирал Паскаль Сорио мэдэгдэл хийж, Европын холбоонд зориулагдсан вакциныг гуравдагч улс руу зараагүй гэж мэдэгдсэн байна.

Гэвч Европын холбооны удирдлага ийм тайлбар хүлээн аваагүй бололтой. Европын холбооны Зөвлөлийн тэргүүн Шарль Мишель нь Европын холбооны комиссын тэргүүн Урсула фон дер Лайенд хандан “Pfizer”, “BioNTech” болон бусад компаниудын үйлдвэрлэсэн вакциныг Европын холбооны гишүүн бус улсуудад худалдах, нийлүүлэхийг яаралтай түр зогсоох тухай мэдэгдэл явуулсан байна. 

“Politico” сонины мэдээлж буйгаар бол Европын холбооны удирдлагууд корона вирусийн эсрэг вакцины экспортыг хориглох төлөвлөгөөг хэдийн гаргачихсан. Гаалийнхан Европын холбооны тусгай зөвшөөрөлгүйгээр вакциныг гадагш гаргахгүй байх тушаал авсан. Корона вирусийн вакциныг гадагш гаргахыг хүсэж байгаа компаниуд нь эхлээд Европын холбооны захиалгыг биелүүлж, хангалттай тооны вакцин нийлүүлэх ёстой юм байна. Ийм арга хэмжээг эхлүүлэх зөвшөөрлийг өнөөдөр албан ёсоор баталж магадгүй гэжээ.