БАЙГАЛЬ ОРЧИН, АЯЛАЛ ЖУУЛЧЛАЛЫН ЯАМНЫХАН СЭЛБЭ ГОЛЫН ЭРГИЙГ НОГООРУУЛЛАА

Байгаль орчин, аялал жуулчлалын яамнаас эх орон, байгаль дэлхийгээ хайрладаг уламжлалт монгол зан заншлаа дээдэлж, хүн бүр байгалиа нөхөн сэргээх, хамгаалахад гар бие оролцох нөхцөлийг бүрдүүлэх, ойн сан, ногоон байгууламжийг нэмэгдүүлэх чиглэлээр хэрэгжүүлж байгаа олон талт ажлын хүрээнд жил бүрийн 5, 10 дугаар сарын хоёр дахь долоо хоногийн амралтын өдрүүд бүх нийтээр мод тарих өдөр болгон тэмдэглэн өнгөрүүлдэг билээ. Өнгөрсөн амралтын өдөр Монгол орон даяар мод тарих хөдөлгөөн өрнөсөн. Тухайлбал, Байгаль орчин, аялал жуулчлалын яамны ажилчин, албан хаагчид уламжлал ёсоор Бэлх дэх "Ойн судалгаа, хөгжлийн төв" буюу Сэлбэ голын эрэгт мод тарилаа. Энэ арга хэмжээг 2010 оноос хойш зохион байгуулах болсон. Өнгөрсөн долоон жилийн хугацаанд тарьсан модоо арчилж, жилийн бүрийн "мод тарих" өдрүүдэд ногоон төглөө өргөжүүлж ирсэн учраас сэлбийн эрэгт тулжээ.

Энэ хаврын тухайд Монгол Улсын Хөдөлмөрийн баатар, гавьяат тамирчин Д.Дагвадорж тэргүүтэй урлаг, спортынхноос гадна "Мото" клубын залуус, бага сургуулийн сурагчид гэх мэтээр нийгмийн бүхий л төлөөлөл нийслэл хотоо ногооруулах үйлсэд гар бие оролцлоо. Мод тарихаар ирсэн зочид ч мод тарих арга хэмжээ жилээс жилд өргөжиж буйг хэлж байсан. Арга хэмжээг Байгаль орчин, аялал жуулчлалын яамны Ойн бодлого зохицуулалтын газрын дарга М.Тунгалаг нээж, үг хэлсэн бөгөөд нэг мод тарих нь 100 жилийн хөдөлмөр байдгийг тэмдэглэсэн. Тиймээс бидний үеийнхний тарьсан мод үр хойчдоо өвлүүлж буй хамгийн том баялаг гэдгийг Байгаль орчин аялал жуулчлалын яам онцоллоо.