ЧАМАЙГ ЭЗГҮЙД БИД ЮМ ЯРЬДАГГҮЙ ГЭВ

О.Баасанхүү гишүүн ирцийн асуудлаар хууль санаачлах боломжтой юу гэдэг асуултыг өнөөдрийн чуулганы хуралдаан дээр тавьсан юм. Тодруулбал, Хууль тогтоомжийн тухай хуульд нэмэлт өөрчлөлт оруулах тухай хуулийн төслийн анхны хэлэлцүүлгийг хийх үеэр энэ асуултыг тавьсан юм. Харин Н.Учрал гишүүн тийм боломжгүй гэж хэллээ. О.Баасанхүү гишүүн өмнөх парламентын үед Ардчилсан намын гишүүд эзгүй байгаа гишүүнийхээ кнопыг дардаг байсан. Одоо ч энэ зөрчил арилахгүй байна. Эхний жил цөөхүүлээ сууж хуралдаж байна, сүүлийн жил рүү 76 тойрог руу явахаар бүр хуралдахгүй болох юм байна хэмээн хэлсэн юм. Тэгвэл УИХ-ын гишүүн Я.Санжмятав хэлэхдээ "О.Баасанхүү гишүүн баян айлын тэнэг хүүхэд шиг юу ч хамаагүй ярьдаг боллоо. Эхлээд зөв ярьдаг байсан чинь одоо бүр нэг юмаа 17, 18 хэлсээр байтал үнэ цэнэгүй болголоо. Ажлаа хиймээр байна. Ирцийн асуудал хөндөж байна, зөв. Гэхдээ хууль батлах хэмжээнд байхад л эзгүй гээд гүтгээд байж болохгүй.Сүүлдээ бүр Ардчилсан намынхан алга гээд гүтгэж байна, сууж л байна шүү дээ. Чамайг эзгүйд бид юм ярьдаггүй. Ганц юм хөөрхий л гэдэг. Кнопоо дараад байж байхад гүжирдэж тарахгүй. Сүүлдээ бүр Ардчилсан намын дотоод асуудал руу орж байна, хэтэрч байна шүү" хэмээн хариуг нь өглөө.