​ЦЭНХЭР ХАЛИМЫГ ТОГЛОСОН МОНГОЛ ХҮҮХДҮҮД БИЕ МАХБОДЬДОО ГЭМТЭЛ УЧРУУЛСАН БАЙЖ БОЛЗОШГҮЙ

Өсвөр насны хүүхдүүдийн сэтгэцэд ноцтой нөлөө үзүүлэх "Цэнхэр халим" гэх тоглоомын талаар сэрэмжлүүлэг мэдээллийг бид өмнө нь хүргэсэн. Тэгвэл манай улсад уг тоглоом орж ирж, хүүхдүүдийн дунд нэвтэрсэн тохиолдол байсныг албаны хүн хэлж байна. Эрүүгийн цагдаагийн албаны тасгийн дарга, цагдаагийн Хошууч С.Ариунболор хэлэхдээ "Цэнхэр халим нэртэй сошиал тоглоом бий болж манай улсаас хийх хандалт нэмэгдэж байгаатай холбоотой шалгалтын ажил хийж байна. Шалгалтын явцад монгол хэл дээр "Цэнхэр халим" нэртэй фэйсбүүк групп хэд хэд нээж, дагагчдын тоо тодорхой хэмжээнд хүрсэнийг цагдаагийн байгууллагаас таслан зогсоож, дээрх группуудыг хаасан байгаа. Дээрх группт нэгдэж орсон дунд сургуулийн болон их дээд сургуулийн оюутан сурагчид даалгавар авч, эхний даалгаваруудыг биелүүлж бие махбодьдоо гэмтэл учруулсан байж болзошгүй байгаа нь тогтоогдсон. Одоогийн байдлаар шалгалтын ажиллагааг үргэлжлүүлж байна" гэж байна.