​36 ХҮН ХОЛБОГДСОН ГААЛИЙНХНЫ ХЭРЭГ ШҮҮХЭЭР ШИЙДЭГДЭХ НЬ ЭЭ

Үндэсний аюулгүй байдлыг хамгаалах, Улсын төсвийн орлогыг бүрдүүлэх зэрэг олон чухал зорилтыг урдаа тавьж ажилладаг гаалийн байгууллагын ажилтнууд үүрэг хариуцлагаа үл тоомсорлон, хууль журам зөрчсөн тухай мэдээлэл олон бий. Өнгөрсөн оны гуравдугаар сарын 30-нд Замын-Үүд дэх гаалийн газарт АТГ-аас гэнэтийн шалгалт хийж, хахууль авсан байцаагчдыг үйлдэл дээр нь илрүүлсэн хэргийн хувь заяа хаашаа эргэх вэ гэдэг асуудал олны анхааралд байгаа гэхэд болно. Тэгвэл уг хэрэгт холбоотой 36 хүнийг шүүх хурал энэ сарын 15-нд Баянгол дүүргийн Эрүүгийн анхан шатны шүүхэд болох товтой байна. Хэрэгт Замын-Үүдийн гаалийн Зөрчлийн албаны дарга асан Цэен, Гааль татварын ерөнхий газрын Бүрдүүлэлтийн дараах хяналт шалгалтын газрын дарга асан Мөнхчулуун, Замын-Үүдийн Хяналт шалгалтын ахлах байцаагч асан Оюунчимэг нарын 7-8 байцаагч холбогдсон байдаг. Өнгөрсөн хугацаанд хэвлэлүүдээр гаалийн 30 гаруй ажилтан холбогдсон гэх мэдээлэл цөөнгүй гарсан. Тэгвэл албан эх сурвалжийн хэлж буйгаар байцаагч нарт хахууль өгсөн, зуучилсан хүмүүс холбогдож байгаа учраас 36 хүн болж буй юм байна. Хэрэгт холбогдсон байцаагчид гаалийн бүрдүүлэлт хийсэн авто машинуудад хяналт шалгалтыг зохих ёсоор хийлгүй хурдан хугацаанд саадгүй гаргах, мөн татварын хувь хэмжээг бууруулахаа амлан БНХАУ-аас Замын-Үүд дэх гаалийн газрын хяналтын талбайд орж ирсэн авто машинуудад ачигдсан бараанд төлөгдвөл зохих татварын мөнгийг бүрэн төлүүлэлгүйгээр гаргаж, бусдаас удаа дараа хээл хахууль авч байсан нь АТГ-ын зүгээс хийсэн шалгалтаар үйлдэл дээрээ илэрсэн байдаг.

Тэрчлэн гаалийн байцаагчдыг Эрүүгийн хуулийн 268 дугаар зүйл. Хээл хахууль авах

268.1. Албан тушаалтан хээл хахууль өгөгчийн ашиг сонирхлын үүднээс албан үүргийн хувьд гүйцэтгэх үүргээ хэрэгжүүлэхгүй байх, эсхүл гүйцэтгэх ёсгүй үйлдлийг хийхээр урьдчилан амлах буюу амлахгүйгээр өөрөө, эсхүл бусдаар дамжуулан хээл хахууль авсан бол тодорхой албан тушаал эрхлэх, үйл ажиллагаа явуулах эрхийг гурван жил хүртэл хугацаагаар хасаж хөдөлмөрийн хөлсний доод хэмжээг тавин нэгээс хоёр зуун тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл таван жил хүртэл хугацаагаар хорих ял шийтгэнэ.

268.2. Энэ хэргийг хясан боогдуулах замаар, эсхүл давтан буюу урьд хээл хахуулийн хэрэгт шийтгүүлсэн этгээд , түүнчлэн зохион байгуулалттай бүлэг, гэмт бүлэглэл үйлдсэн, эсхүл их буюу онц их хэмжээний хээл хахууль авсан бол эд хөрөнгийг хурааж, таваас дээш арван жил хүртэл хугацаагаар хорих ял шийтгэнэ.

269 дүгээр зүйл. Хээл хахууль өгөх

269.1. Албан тушаалтанд өөрөө буюу бусдаар дамжуулж хээл хахууль өгсөн бол хөдөлмөрийн хөлсний доод хэмжээг тавин нэгээс хоёр зуун тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл гурван жил хүртэл хугацаагаар хорих ял шийтгэнэ.

269.2. Энэ хэргийг давтан, эсхүл хээл хахуулийн хэрэгт урьд ял шийтгүүлсэн этгээд, түүнчлэн зохион байгуулалттай бүлэг, гэмт бүлэглэл үйлдсэн бол таваас дээш найман жил хүртэл хугацаагаар хорих ял шийтгэнэ" гэсэн зүйл ангиудаар буруутгаж байгаа юм.