​ШАХААЧДЫГ ЗАРЛАЖ, ЗАЙЛУУЛЪЯ

Төрийн нэрээр хийж ирсэн бүх ШАХААГ зогсоох хэрэгтэй гэдгийг Ерөнхийлөгч хэлсэн билээ. Ерөөс төрийн яам агентлаг аж ахуй эрхэлдэгийг болих хэрэгтэй. Хямралыг давъя гэвэл төр, бизнес хоёрыг салгах хэрэгтэй. Төрийн нэрээр хийдэг бүх шахааг зогсох хэрэгтэй. Сайдын албан тушаалыг ченжийн ажилтай давхарлан хашиж болохгүй. Шинэ хуучин сайдууд тамганы ёслол хийдгийг болих хэрэгтэй. Сайд тушаал, захирамж гаргах эрхгүй. Төрийн нарийн бичгийн даргын эрх хэмжээнд хадгалагдах ёстой. Төрийн үйл ажиллагаа, төрийн аж ахуйн үйл ажиллагааг салгахгүйгээр байдал сайжруухагүй. Аж ахуйтай орооцолдсон сайд дарга нар авилга, хэрүүл маргаанаас холдож чаддаггүй юм. Төрийн төмөр нүүр, хуулиар энэ бүхнийг засахаас өөр аргагүй. Төрийн бүх тендер, худалдан авалт, хөрөнгө оруулалт зэргийг цалгардуулагчийг төрөөс салгаж, мэргэжлийн байгууллагаар шийдүүлж, олон нийтийн хяналтанд шилэн болгох хэрэгтэй хэмээн төрийн тэргүүн хэлээд байгаа. Үнэхээр ч Монгол төрд бугласан бүх ШАХААГ үлдэн хөөхгүй бол улс орны хөгжлийн тухай үглэж яриад хэрэггүй гэдгийг бодит нөхцөл байдал бэлхнээ харуулж буй.

ШАХАА гээд ярихаар хэн хүний толгойд Эрдэнэт үйлдвэр ордог гэхэд хэтрүүлсэн болохгүй. Улсын эдийн засагт жин дарах нөлөөллийг үзүүлж ирснийхээ хэрээр их мөнгөний эргэлт, үүц байж ирсэн тус үйлдвэрийг улстөрчид төдийгүй салбар салбарын нөхдүүд ШАХАА-ны үүр уурхай болгон ашиглаж ирсэн нь үнэн. Ямартаа л өдгөө гишүүнээр суугаа Д.Дамба-Очир гишүүн хэвлэлд өгсөн ярилцлагадаа хэлсэн байна билээ. Эрдэнэт үйлдвэрийн худалдаа эрхэлсэн захирлаар ажиллаж байсан хүн ч мэдэж л байгаа л даа. Тэр хэлэхдээ "Намайг байхад ч тэр дуучид нь байна уу, бөхчүүд нь байна уу, УИХ-ын гишүүд нь ч байна уу төр гэсэн нэрийн дор шахаа гэрээ хийдэг байсан нь үнэн. Бүгдээрээ мэдэж байгаа. Би тав, зургаан жил ажиллахдаа гадаадад гаргадаг баяжмалын гэрээг нь сайжруулж, зардлыг нь буулган, импортын гэрээг нь бүгдийг цэгцэлсэн. Ингэснээрээ их олон хүний дургүйг хүргэсэн. Тийм ч учраас намайг ажлаа өг гэж шахсан. Үндсэндээ Эрдэнэтээс халагдаж, хөөгдөөд явсан. Яагаад вэ гэвэл би цэгцлэх гэж оролдсон, олон хүн идэж уудгийг хаах гэж оролдсон, тэгснээрээ өөртөө буруу зүйл хийсэн. Гэхдээ миний тухайн үеийн итгэл үнэмшил 40 гарч явсан залуу хүний хувьд шударга ажиллаж байж ирээдүйд нэр төртэй амьдрахыг илүүд үзэж байсан. Одоо ч энэ үзэл бодол маань хэвээрээ" хэмээн ярьжээ.

Үнэндээ бол "Эрдэнэт" үйлдвэр хяналтаа тогтоох гэж улайрдаг газар байсаар олон жил өнгөрч буй. Хэн сонгуульд ялна, тэр хүн Эрдэнэтээс идэж уудаг жишиг тогтож өдийг хүрсэн. Тиймээс ч Эрдэнэт болон бусад төрийн өмчит үйлдвэр, газруудыг шахааны обьект болгон ашиглаж ирсэн улстөрчид ШАХАА-ныхаа үүх түүхийг илчилж, үнэн замаар замнах цаг болсныг сануулмаар байна.

ШАХАА гэдгийг тодруулан тайлбарлавал, тухайн бараа, бүтээгдэхүүн, үйлчилгээг зах зээлийн үнээс, жишиг өртгөөс хамаагүй өндөр үнээр нийлүүлж, зөрүүг нь өөрийнхөө хэтэвч рүү хийхийг л хэлээд байгаа юм л даа. Тэгэхээр энэ бол улс орны ирээдүй рүү хар ус цацаж байгаа л явдал юм. Тиймээс Монгол төрийн ШАХААЧ-дыг илчлэн, улмаар тэдний бусармаг үйлдлийг зогсоох ажлыг АТГ хиймээр байна. Үүнийг хийхгүй бол АТГ гэж байх хэрэг юу байна вэ?

Эх сурвалж: Зариг.мн