М.ЭНХБОЛД АЛБАН ЁСООР БИЧИГ БАРИМТАА ХҮЛЭЭЛГЭН ӨГЛӨӨ

МАН-аас Ерөнхийлөгчийн сонгуульд нэр дэвшигч М.Энхболд өнөөдөр өглөө Сонгуулийн ерөнхий хороонд бичиг баримтаа хүлээлгэн өглөө. МАН-аас нэр дэвшигч М.Энхболдын бичиг баримтыг СЕХ хүлээн авч энэ сарын 14 буюу энэ долоо хоногт бүртгэх эсэх асуудлыг шийдвэрлэж тогтоол гаргах юм.

Ерөнхийлөгчийн сонгуульд нэр дэвшигч М.Энхболд хэлэхдээ "Төрт ёс Монгол төрийн тэргүүний сонгуулийн эрхэм хүндтэй энэ үйл ажиллагаанд хүндэтгэлтэй хандах ёстой гэдэг үүднээс МАН-аас нэр дэвшсэн миний бие өөрийн биеэр хуулийн хугацаанд нэр дэвшигчийн бүрдүүлэх ёстой материалуудыг бүрэн дүүрэн хуулийн дагуу бүрдүүлж Сонгуулийн Ерөнхий Хороонд өглөө. МАН ахмад, дунд, залуу үеийн алтан хэлхээн дээр тогтож ирсэн олон арван жилийн уламжлалтай улс төрийн хүчин. " гэлээ. Мөн тэрбээр энэ удаагийн төрийн тэргүүний сонгууль хуулийн дагуу, хуульд нийцсэн, бодлого үйл ажиллагааны шударга өрсөлдөөн байгаасай гэж хүсэж байна" гэв.

Нэр дэвшигчийн бичиг баримт хүлээлгэн өгөх ажиллагаанд МАН-ын ахмад, дунд, залуу үеийн төлөөлөл оролцсон юм. Тодотгоход, СЕХ нэр дэвшигчийг бүртгэсэн тухай шийдвэр гарснаас хойш ажлын гурав хоногийн дотор буюу тавдугаар сарын 17-ны дотор Ерөнхийлөгчид нэр дэвшигчдийг улсын хэмжээнд олон нийтэд мэдээлэх үүрэгтэй юм.

Эх сурвалж: Зариг.мн