​"Энэ чуулган үр дүнгээ өгдөг байсан бол иргэдийн амьдрал ингэтлээ дордохгүй л байсан"

Энэ сарын 18-19-нд Эдийн засгийн чуулга уулзалт зохион байгуулагдах товтой байсан билээ. Тэгвэл Ерөнхий сайд Ж.Эрдэнэбат тус чуулганыг зохион байгуулах Ажлын хэсгийнхэнтэй өнөөдөр уулзахдаа тус арга хэмжээг хойшлуулах болсноо албан ёсоор дуулгажээ. Хойшлуулах болсон хэд хэдэн шалтгаан байгаа аж. Тухайлбал, "Засгийн газраас ОУВС-тай хийж байгаа хэлэлцээр эцэслэн дуусч, хөтөлбөр хэрэгжих эсэх нь тодорхой болохыг хүлээе. Ингэснээр Эдийн засгийн чуулганаар юуг голчилж ярих, Монгол Улс эдийн засгийн ямар бодлогыг яаж хэрэгжүүлэх нь тодорхой болно гэж байна.

Мөн Ерөнхийлөгчийн сонгуулийн кампанит ажил эхэлсэн байгаа энэ үед чуулганыг улс төр давамгайлсан, үр дүн багатай болгох магадлалтай. Эдийн засгийн асуудлыг ямар ч улстөргүйгээр ярих хэрэгтэй. Эдийн засгийн чуулганыг илүү үр дүнтэй зохион байгуулахын тулд өмнөх чуулгануудын зөвлөмж, үр дүнг эргэж ярих, алдаагаа олж харах хэрэгтэй байна. Энэ чуулган үр дүнгээ өгдөг байсан бол эдийн засаг өнөөдрийнх шиг унахгүй, иргэдийн амьдрал ингэтлээ дордохгүй л байсан. Хэдэн хүн цуглуулж, гадна дотноос зочин уриад ямар нэгэн хурал цуглаан хийж болно, хамгийн гол нь үр дүн л хэрэгтэй байна хэмээн Ерөнхий сайд үзэж байна.