​Өттэй будаагаа өөд нь татаж сурталчилдаг Агь ХХК-ийг шалгахыг Мэргэжлийн хяналтаас шаардаж байна

"Тэсо"корпорацийн охин компани "Агь" ХХК Сакура, Слава будаа зэрэг шилдэг бүтээгдэхүүнүүдийг Монголын зах зээлд нийлүүлж байна хэмээн өөрсдийгөө рекламддаг. Гэтэл учиргүй их магтсан сурталчилгаатай Слава брэндийн гурвалжин будаан дотроос нь өт хорхой гарч ирсэн талаар нэгэн хэрэглэгч гомдол гаргаад байгаа аж. Дараах бичлэгээс үзэхэд сүүнд будаагаа хийж дэвтүүлтэл дээр нь хорхойнууд хөвж гарч ирсэн байна.

Гол нь энэ бол хэрэглэгчдийн эрүүл мэндтэй шууд холбоотой асуудал. Тиймээс ч уг будааг Wellmart дэлгүүрээс худалдаж авсан хэрэглэгч дүүргийн мэргэжлийн хяналтад хандахад, тус байгууллагаас будаа зарсан дэлгүүрийг багахан хэмжээний мөнгөөр торгоод өнгөрсөн байна. Харин будааг гаднаас оруулж ирээд өөрсдөө савлаад дэлгүүрт нийлүүлсэн "Агь" ХХК-тай хэн ч хариуцлага яриагүй нь анхаарал татаж буй юм.

Хэрэглэгчийг хаанд өргөмжилсөн худал сурталчилгаа цацчихаад, итгэж худалдаж авсных нь хариуд ам руу нь өттэй будаа хийж буй бол Агь ХХК-нд хариуцлага хүлээлгэх ёстой юм. Эрүүл мэнд гэдэг бол хамгийн чухал асуудал. Энд ханцуй нь урагдсан цамц худалдаж авсан тухай яриагүй. Хүний ходоодонд орж хоол болох ёстой будааны тухай ярьж байна. Тиймээс холбогдох мэргэжлийн хяналтын байгууллагаас Агь ХХК-д шалгалт оруулж, хариуцлага хүлээлгэхийг шаардаж байна.

Эх сурвалж: Зариг.мн