УБТЗ-ын ажилтан Б галт тэрэгтэйгээ шатаж амь насаа алджээ

Өнгөрөгч аравдугаар сарын 20-21-нд шилжих шөнө УБТЗ-ын ажилтан Б нь галт тэрэгтэйгээ шатсан харамсалтай хэрэг гарлаа. Уг хэрэг Замын-Үүд чиглэлийн Шаргын-Овоо өртөөнд болсон байна. Талийгаач 37 настай Б нь вагон цуваандаа байрлаж байхдаа буюу тухайн өдөр ажлаа тараад вагондоо галлагаа хийгээд унтсан бөгөөд галт тэрэгтэйгээ шатаж байна гэх дуудлагаар Онцгой байдлын 3 автомашин, аврагчид ирж унтаарсан тухай эх сурвалж мэдээлж байгаа юм.

УБТЗ-д ажиллаж буй ажилчдаас жилд олон хүн нас бардаг ч энэ тухай нууцлан, эцсийн дүгнэлтээр хохирогчийн буруу болж таардаг тухай иргэд гомдоллодог юм. Ажилчдын хувьд сард 1-2 өдөр л ар гэртээ харьж амрах боломж олддог. Ихэнхи цагаа ажлын байран дээрээ буюу хөдөө өнгөрүүлдэг. Ингэхдээ амралт байхгүй, өдрийн хоёр хоолтой, зуны халуун, өвлийн хүйтэнд ажилладаг ч дарга удирдлагууд нь хэн нэгний томилгооны хүмүүс байдаг учир нөхцөл байдлыг төдийлөн мэддэггүйгээс ажлын хариуцлага алдаж, эрдэнэт хүний амь эрсдэх нөхцлийг бүрдүүлдэг байх хэмээн эх сурвалжууд хэлж байгаа юм. 2019 онд сургуулиа төгсөж ирээд ажлын гараагаа эхлүүлж байсан замчин залуу ажлаа хийж яваад вагонд дайруулсан хэрэг гарч байсан. Өртөөчин, машинист хариуцлага алдаж галт тэрэг ирэх хугацааг буруу мэдэгдснээс үүдэж уг харамсалтай хэрэг гарсан ч талийгаачийг амиа хорлосон гэсэн эцсийн дүгнэлт гарч байсан байна. Үүнээс гадна холбогч, найруулагч ажилтай УБТЗ-ын ажилтан вагонд хавчуулагдсан хэрэг ч мөн гарч байжээ. Үүнийг нь мөн л ажлын бүрэлдэхүүн дутуу байхад ажлаа хийсэн гэсэн дүгнэлтээр хэргийг хааж байсан байх юм. Энэ мэт олон хүний амь үрэгдсэн хэргүүд УБТЗ-д гардаг байна. Харамсалтай нь өдрийн бор хоолоо залгуулж буй ажилчид, тэдний ар гэр нь хоолноосоо салахгүйн тулд /УБТЗ ар, өврийн хаалга их учир ажлаас амархан халж, халаа сэлгээ хийдэг/ чимээгүй өнгөрдөг байна.