​"Үнэт цаасны төвлөрсөн хадгаламжийн төв" ХХК шалгалтад бүдэрчээ

Төрийн өмчийн бодлого зохицуулалтын газраас төрийн өмчит болон орон нутгийн өмчит аж ахуйн нэгжүүдэд санхүүгийн шалгалт хийж байгаа. Тэгвэл энэ хүрээнд "Үнэт цаасны төвлөрсөн хадгаламжийн төв" ХХК-ийн 2015, 2016 оны гуравдугаар улирлын санхүү, эдийн засгийн үйл ажиллагаанд баримтын шалгалт хийсэн байна. Шалгалтаар тус компани Төрийн болон орон нутгийн өмчийн тухай хуулийн 21 дүгээр зүйлийн 12 дахь хэсэгт заасныг зөрчиж, 5,5 сая төгрөгийн урамшуулал олгосон зөрчил илэрчээ. Шалгалтын дүгнэлтийг гаргахдаа тус компанийн санхүү, эдийн засаг, үйлдвэрлэл, үр ашгийн байдал, төрийн өмчийн бүрэн бүтэн байдал, хадгалалт, хамгаалалт, эзэмшилт, захиран зарцуулалт, хөрөнгөд бүртгэлээр тавьж буй хяналт, гүйцэтгэх захиралтай байгуулсан "Хөлсөөр ажиллуулах гэрээ", "Өмч эзэмшлийн гэрээ"-гээр хүлээсэн үүргийн хэрэгжилтийн явц, өр авлага, барагдуулалт, аж ахуйн нэгжтэй байгуулсан гэрээ хэлцэл, худалдан авалтын үйл ажиллагааг хамруулж шалгасан юм байна.

Улмаар Ажлын хэсгийн зүгээс шалгалтаар илэрсэн зөрчил, дутагдлыг арилгах, давтан гаргахгүй байх, компанийн өмнө тулгамдсан асуудлыг шийдвэрлэх чиглэлээр ажиллахыг компанийн удирдлагуудад үүрэг болгосон байна.

Эх сурвалж: Зариг.мн