Х.Нямбаатар: Есөн настай охиныг хөнөөсөн хэргээр баривчлагдсан хойд эцэг нь эхний мэдүүлгээр хэргээ хүлээжээ

Энэ сарын 20-нд буюу өнгөрөгч ням гарагт Баянзүрх дүүргийн 23 дугаар хороонд амьдран суух 9 настай Э охин 36 настай хойд эцэг Б-ийн гарт амь насаа алдсан байж болзошгүй хэрэг гарсан. Тэгвэл энэ хэрэг дээр ЦЕГ-аас ажлын хэсэг гаран хэрэг үйлдэхэд хүргэсэн нөхцөл байдлыг мөн шалгаж байгаа юм. Тэгвэл Хууль зүйн сайд Х.Нямбаатар уг асуудлын талаар өнөөдөр мэдээлэл хийсэн. Тэрээр “Уг хэргийг шалгаж үзээд хариуцлага алдсан болох нь тогтоогдвол холбогдох байгууллагууд хариуцлага хүлээх ёстой. Олон нийтийн цагдаа нарын орон тоог нэмэгдүүлсэн ч гэмт хэргээс урьдчилан сэргийлэх ажлын хөрөнгөөр гадны улс орон руу томилолтоор явдаг, машин техник авдаг байдлыг зогсоож хүний нөөцөө нэмэгдүүлэх шаардлага бий” гэдгийг онцолсон юм.
ШШҮТ-өөс талийгаач охин Э-ийн амь насаа алдсан шалтгааныг тодруулахаар шинжилгээ хийхэд урьдчилсан байдлаар удаан хугацаанд хүчирхийлэлд өртдөг байсан нь тогтоогдсон гэж гарсан. Тэгвэл охины амь насыг хороосон байж болзошгүй гэж сэжиглэгдэж байгаа хойд эцэг болох 36 настай Б нь эхний мэдүүлгээрээ хэргээ хүлээгээд байна.