Шинээр ипотекийн зээл авах иргэдийн хүүг зургаан хувь болгох асуудлыг чуулганаар хэлэлцэнэ

Барилга, хот байгуулалтын яамны ахлах мэргэжилтэн Э.Батболд ипотекийн зээлийн найман хувийг зургаан хувь болгох судалгаа, тооцооны талаар мэдээлэл өглөө. Тэрбээр “Ипотекийн зээлийн хөтөлбөрийн хүрээнд 4.9 их наяд төгрөгийг 100,000 гаруй зээлдэгчид найман хувийн хүүтэй олгосон. Зээл авсан хүмүүсийн материалыг судлаад үзэхэд дийлэнх нь сарын хоёр сая төгрөгөөс дээш орлоготой, сард дунджаар 681,000 төгрөг төлж байгаа иргэд голдуу байна.Эндээс харахад улсын дундаж өрхийн орлого болох 1.3 сая төгрөгөөс доош орлоготой иргэд ипотекийн хөтөлбөрт хамрагдаж чадахгүй байна. Өөрөөр хэлбэл, ипотекийн зээл зорилтот бүлгийнхэнд хүрч чадахгүй байна гэж үзэж байгаа.

Тиймээс ажлын хэсгээс хүүг бууруулбал ипотекийн зээлд зорилтот бүлгийнхэн хамрагдах боломжтойг тооцож үзсэн. Тодруулбал, ипотекийн зээлийн хүүг зургаан хувь болгон бууруулж, зээлийг үргэлжлүүлэх судалгаа, тооцоог гаргаад байгаа юм. Гэхдээ орон сууцны зээл шинээр авахад зургаан хувийн хүүтэй зээл олгоно.Харин найман хувийн зээлтэй иргэд зээлээ төлж дуусаад, дараагийн орон сууцаа авахад зургаан хувийн хүүтэй зээл авах боломж нь нээлттэй” гэв.Орон сууцны ипотекийн зээлийн найман хувийн хүүг бууруулах асуудлыг УИХ-ын намрын чуулганаар хэлэлцэх юм.