“Apple”, “Nike”–ийг боолын хөдөлмөр ашиглаж байгаа Хятадаас үйлдвэрүүдээ гаргахыг шаарджээ

Дэлхийд алдартай хувцасны брэнд үйлдвэрлэгчдийг уйгуруудыг албадан хөдөлмөр эрхлүүлж байгаа Хятадын нийлүүлэгч компаниудаас харилцаагаа таслахыг хүний эрхийг хамгаалах үйл ажиллагаа явуулдаг дэлхийн 36 орны 190 ТББ-ууд шаардсан тухай “BBC” бичсэн байна.

Өрнөдийн дэлгүүрүүдээр зарагдаж байгаа таван хувцас хэрэглэл тутмын нэгд нь Хятадад үндэсний цөөнх болдог уйгур, казах гэх мэт лалын шашинтан голдуу үндэстэн ястнуудыг хорьж, хүчээр ажиллуулдаг “хүмүүжүүлэх төвүүд”-тэй Шинжааны хөвөн, эсвэл нэхмэл даавуу байдаг гэж эдгээр ТББ-уудаас гаргасан мэдэгдэлд дурджээ. Иймд дэлхийн алдартай хувцасны брэндүүд 12 сарын дотор энэ мужид үйл ажиллагаа явуулдаг ханган нийлүүлэгчдээс бизнесийн холбоогоо таслахыг ёстой гэжээ.

Шинжээн дах “дахин хүмүүжүүлэх төв”-үүд дэх түрэг болон лалын шашинт үндэстнүүдийн тоо 1-1,8 саяд хүрээд байгаа аж. Улмаар Шинжаанд албадан хөдөлмөр эрхлүүлж байгаа гэсэн нотолгоо улам бүр өсөн нэмэгдэхийг дагаад хувьцаа эзэмшигчид нь уйгуруудын хөдөлмөрийг сорж баяжиж байна гэсэн зэмлэлд компаниуд янз бүрээр хариу өгч байгаа юм байна. Дэлхийн нийт хөвөнгийн 20 хувь нь Шинжаанаас гаралтай байдаг тул энэ удаагийн кампанит ажилт нь хувцас үйлдвэрлэгчдийг чиглэжээ.

“Nike” компани нь боолын хөдөлмөртэй холбоотой эрсдэлийг үгүй хийхийн тулд ханган нийлүүлэгч компаниудтайгаа тул ажилладаг гэж мэдэгдсэн. Тухайлбал, нэг нийлүүлэгч болох “Taekwang” компанитай ярилцсанаар үйлдвэр дээрээ Шинжаанаас ажилчин хөлсөлж авахыг нь зогсоосон аж. “Nike” нь энэ талаар ярихдаа “Энэ бол маш чухал асуудал. Манай компани нь нэрийн дэлгүүрүүддээ боолын хөдөлмөрөөр хийгдсэн бүтээгдэхүүн тавигдах боломжийг үгүй хийхийн тулд шинжээч нартай ажилласан хэвээр байгаа” гэсэн байна.

Гэсэн хэдий ч боолын хөдөлмөрийн асуудал нь зөвхөн хувцсаар хязгаарлагдахгүй гэдгийг ТББ-ууд онцолжээ. Тухайлбал, “Apple” компанийг хар жагсаалтад орсон “O-Film” компаниас айфоныкамерыг авч байна гэж буруутгасан. Үүний хариуд “Apple” нь Хятад дах нийлүүлэгч компаниудынхаа хөдөлмөрийн нөхцөлийг нарийн хянадаг тул ёс бус зүйлтэй таараагүй гэсэн байна.

Жижиглэн худалдаа эрхэлдэг компаниуд нь ихээхэн алдагдал хүлээж магадгүй нөхцөлд л ёс зүйтэй хөдөлмөр эрхлэлтийн төлөө бодитоор хөдөлж эхэлнэ гэж хүний эрхийг хамгаалагчид үздэг.

Жишээлбэл, “Tommy Hilfiger”, “Calvin Klein” гэсэн брэндүүдийг эзэмшдэг “PVH” корпораци нь уйгуруудын эрхийг хамгаалагчдын хүчтэй шаардлагатай тулгарсны дараа л Шинжаанаас гаралтай хөвөнгөөс бүрэн татгалзаж, тус мужид үйл ажиллагаа явуулдаг бүх компаниудаас харилцаагаа таслахаар шийдсэн тухайгаа “New York Times” сонинд мэдээлсэн байна.