Г.Занданшатараас "ОНТРЭ"-гийн хэлцлийг амжилттай хийхийг олон нийт хүлээж байна

"Онтрэ" ХХК-ийн эзэмшиж буй Оюутолгойн бүлэг ордод хамаарах тусгай зөвшөөрөл бүхий хоёр талбайгаас Монгол Улс хэрхэн ашиг хүртэх дээр засгийн газар анхаарлаа хандуулах хүлээлт үүссэн. Тус компанитай холбоотой асуудлыг шийдвэрлэхийн тулд Ерөнхий сайд асан Л.Оюун-Эрдэнэ идэвхийлэн ажиллаж байсан бол одоо Г.Занданшатарын засгийн газар хэрхэх нь хүлээлт дагуулж байна.

"Онтре"-гийн эзэмшлийн талбайд 10.3 сая тонн зэс, 742 тонн алт, 3300 тонн мөнгө, 190,000 тонн молбидений нөөц бий. Энэ нь Оюутолгойн бүлэг ордын зэсийн 24 хувь, алтны 42 хувь, мөнгөний 29 хувь, молибденийн металлын 94 хувь нь хамаарч байгаа юм. 

Монгол Улсын Их хурал 2021 оны арванхоёрдугаар сарын 30-ны өдөр 103 дугаар тогтоолыг баталсан. "Оюутолгойн ордоос Монгол Улсын хүртэх үр ашгийг нэмэгдүүлэх арга хэмжээний тухай" тогтоолыг баталсны дараа тухайн үед УИХ-ын даргаар Г.Занданшатар ажиллаж байсан.

Одоо Г.Занданшатар гүйцэтгэх засаглалын тэргүүн боллоо. Тэрээр ерөнхий сайдаар томилогдсон өдрөө уг асуудлаар “Байр сууриа ил тод илэрхийлэх эрт байна. Хувь хүнийхээ хувьд “Онтрэ”-тэй тусдаа гэрээ байгуулах нь зүйтэй гэж боддог” гэж байсан юм.