Хөлбөмбөгийн тэмцээн зохион байгуулахыг УОК зөвшөөрөөд, гурав хоногийн дараа цуцалжээ

Улсын Онцгой комиссын шийдвэрээр “Үндэсний Их баяр наадмыг цаг үеийн байдал, шинэ нөхцөлд тохируулан зохион байгуулах нь зүйтэй” гэж үзсэн. Өөрөөр хэлбэл, иргэдийн бөөгнөрөл, цугларал үүсгэхгүйгээр, халдвар хамгааллын дэглэмийг сайтар мөрдөн зохион байгуулж, иргэдэд цахимаар болон хэвлэл мэдээллийн хэрэгслээр дамжуулахаар болсон. 

Тэгвэл үүнтэй ижил шийдвэрийг Монголын Хөл бөмбөгийн Холбоонд Улсын Онцгой Комисс энэ сарын 18-ны өдөр хүргүүлсэн байна. Тодруулбал, Монголын Хөл бөмбөгийн Холбоо “Үндэсний Дээд Лиг”, “Нэгдүгээр Лиг”, “Футзалын Дээд Лиг”-ийг халдвар хамгааллын дэглэмийг чанд мөрдөн 6-р сарын эхний долоо хоногоос эхлэн явуулах зөвшөөрлийг олгосон учир бэлтгэл ажилдаа ороод байжээ. Гэтэл Улсын Онцгой Комисс шийдвэрээ гурав хоногийн дараа өөрчилж, цуцлах шийдвэр гаргажээ. 

Зөвшөөрлийн бичиг гарсан даруйд тэмцээнд оролцох баг тамирчид мэдүүлгээ явуулж, бэлтгэл сургуулилт хийх талбайтайгаа гэрээ байгуулж, хувцас хэрэглэлээ бэлдэж эхлэхээс гадна халдвар хамгааллын дэглэмтэй холбоотой тоног төхөөрөмж, хэрэгслүүдийг худалдан аваад байснаа хэлж байна. Харин гурав хоногийн дараах шийдвэр гарснаар их хэмжээний зардал хэдийн гаргаад тэмцээнээ эхлүүлэхэд бэлэн болсон клубүүд болон зохион байгуулагч Монголын Хөл бөмбөгийн Холбооны зүгээс одоо хэрхэхээ мэдэхгүй хүнд байдалд ороод байна гэлээ.

Эдгээр  3 тэмцээнийг үзэгчгүй зохион байгуулж, тамирчдыг талбайд гарах болон талбайгаас дотогш ороход бие биенээсээ зай барих, албаны хүмүүс 20 минут тутам ариутгал хийх зэрэг журмыг дагаж мөрдөхөөр төлөвлөөд байсан ч ийнхүү цуцлагджээ. 

Харин Үндэсний Их баяр наадмын үеэр урлагийн тоглолт явагдаж, наадмууд уламжлалт хэлбэрээрээ зохион байгуулагдахаар болсноор хамгийн багаар бодоход үзэгчээс гадна урлагийн ажилчид, бөхчүүд, унаач хүүхэд, уяачид, харваачид гээд 5000 гаруй хүн наадам зохион байгуулахад оролцоно. Энэ үеэр халдвар хамгаалал хэрхэн сахих нь эргэлзээтэй юм.