“Ээжийг аав зодсоныг хэлчихвэл бид бүтэн өнчин хүүхдүүд болчихно ш дээ”

Энэ сарын 15-ны өдөр Говь-Алтай аймгийн Тонхил сумын Засаг дарга Д гэр бүлийн хүчирхийллийн гэмт хэрэг үйлдэж, эхнэрийнхээ аминд хүрсэн хэрэг гарсан. Хэргийг аймгийн цагдаагийн газарт шалгаж, хэрэгт холбогдогч Д-г нэг сарын хугацаатай цагдан хорьж, шалгаж байгаа юм.

Талийгаач 38 настай Б-ийн цогцост хийсэн ШШҮХ-ийн шинжилгээний дээжийг  өчигдөр 15.00 цагийн орчимд Улаанбаатар хот руу явуулжээ. Талийгаачийн ах дүүсийн хэлж байгаагаар цогцос нь хүн харахын аргагүй хөх эрээн, шүд буйл нь хүртэл гэмтсэн байсныг хэлж байна. Тиймээс ШШҮХ болон цагдаа, прокурор, шүүхийн байгууллага шударга шийднэ гэдэгт итгэж байгаагаа илэрхийлж байгаа юм. Мөн Д нь өмнө нь буу гаргаж, эхнэрээ “буудаж ална” хэмээн сүрдүүлж байхад нь талийгаачийн ах болиулж, цагдаад дуудлага өгөөд, “бууг нь хурааж аваарай” гэдэг хүсэлт тавьж, сануулж байжээ.

Д-ынх 3-13 насны нэг хүү,  хоёр охинтой бөгөөд Д-ын ээжийнх болон ахынхтай нэг хашаанд амьдардаг байжээ. Хэрэгт холбогдогч Д “15-ны 03-09 цагийн хооронд талийгаачийг дарамталж, зодсон” талаараа мэдүүлж байгаа бөгөөд энэ хугацаанд нэг хашаанд байсан ээж болон ах нар нь тусламж үзүүлж, эмнэлэг, цагдаагийн байгууллагад дуудлага өгөөгүйд талийгаачийн эгч, ах дүүс гомдолтой байгаагаа хэлж байна. Түүнчлэн талийгаачийн хүүхдүүд ч “Ээжийг аав зодсон талаар хэлчихвэл бид бүтэн өнчин хүүхдүүд болчихно ш дээ” гэсэн айдастай байсан нь гэр бүлийн хүчирхийлэл байнга үйлдэгдэж, хүүхдүүд нь нэгэнт айдастай болсны шалтгаан гэж тэд үзэж байна. Хүүхдүүд одоогоор эмээгийнхээ гэрт байгаа аж.  

Талийгаач өмнө нь ч нөхөртөө зодуулж, цагдаагийн байгууллагад хандаж байсан бөгөөд ах дүүс нь салгахаар ярилцахад “Хоёр охин хүүхдээ эцэггүй болгож, хүний гар харуулмааргүй байна” гэсэн шалтгаанаар гэр бүлээ бүтэн авч үлддэг байжээ.  

Нэмж мэдээлэхэд, хэрэгт холбогдогч Д нь 2008 онд таван найзынхаа хамт Тайширын усан цахилгааны орчимд амарч яваад, хамт явсан таван хүн нь нууранд живж амиа алдсан хэрэг гарч байжээ: