Таксины жолоочийг хөнөөсөн этгээдийг төрсөн нутагтаа очсон байхад нь баривчилжээ

Өнгөрсөн тавдугаар сарын 12-нд Баруун салаанд байрлах эзгүй хашаанаас бусдын гарт амиа алдсан эрэгтэй хүний цогцос олдсон талаар бид өмнө нь мэдээлсэн. Тодруулбал, Баянгол дүүргийн долдугаар хороонд оршин суух хаягтай эрэгтэй “Х” /эр.54н/ нь тавдугаар сарын 11-ны өглөө 06 цагийн орчимд гэрээсээ өөрийн эзэмшлийн автомашинтай “таксинд явна” гэж гараад, ийнхүү амиа алдсан байдалтай олдсон. Ингэхдээ толгойн яс цөмөрч, гар болон хуруу нь хугарсан байсан нь ШШҮХ-ийн шинжилгээгээр тогтоогджээ.

Уг хэргийг үйлдсэн байж болзошгүй сэжигтнийг цагдаагийн байгууллага орон даяар эрэн хайж, тавдугаар сарын 17-ны Архангай аймгаас баривчилсан байна. Тухайн этгээд 1980 онд Архангай аймагт төрсөн М гэгч бөгөөд эрхэлсэн тодорхой ажилгүй, хэрэг гарах үед нийслэлд ажил хийх зорилгоор ирсэн байгаад, талийгаачтай үл ялих зүйлээс болж маргалдаж амь насыг нь хохироосон гэдгээ урьдчилан байдлаар мэдүүлсэн байна.