Эмийн санг түрээслэгчид 1.3 жилийн ял, барилгын эзэнд 1 жилийн тэнсэн ял оноожээ

Өнгөрсөн 2018 оны зургаадугаар сард СБД-ийн долоодугаар хороонд байрлалтай Эмийн сангийн гаднах талбайд тоглож байсан 10 настай хүү шатны төмөр бариулаас барьж, тогонд цохиулж нас барсан харамсалтай хэрэг гарсан.

Тэгвэл уг хэргийн шүүх хурал болж, холбогдох этгээдүүдэд ял оноолоо. Тодруулбал, Эмийн санг түрээслэгч Г.Ганпүрэвт 1,3 жилийн хугацаагаар хорих ял оноож,  барилгын эзэмшигч “Дэлгэр тур” ХХК-ийн захирал С.Энхжаргалд нэг жилийн тэнсэн харгалзах ял оноож, шийдвэрлэлээ.

Ингэхдээ бага насны хүүхдийн амь насыг болгоомжгүйгээр хөнөөсөн, хөдөлмөр аюулгүй байдлыг мэдсээр байж хангаагүй шалтгаанаар ял шийтгэсэн бөгөөд талийгаач хүүгийн оршуулгын зардал болох 50 сая төгрөгийг дээрх хоёр иргэн хувааж төлөхөөр шийдвэрлэжээ.