Оргодол олдоогүй 10 хонож байна

Өнгөрсөн дөрөвдүгээр сарын 27-ны өдөр буюу өнөөдрөөс арав хоногийн өмнө ШШГЕГ-ын харъяа цагдан хорих 401-р ангид хоригдож байсан хоригдол оргосон талаар бид мэдээлсэн.

29 настай хоригдол О нь бөөрний өвчний улмаас долоо хоногт хоёр удаа бөөрний аппаратад ордог байсан тухайн өдөр ХУД-т байх .... хувийн эмнэлэгт уг үйлчилгээг авч байхдаа оргосон байдаг. Тэрбээр шүүхээс 5.5 жилийн ял шийтгэл авсан бөгөөд нэг жилийн ялаа эдлээд байхдаа ийнхүү оргосон юм.

Оргодлыг эрэн хайх ажиллагааг ШШГЕГ-ын алба хаагчид тасралтгүй явуулж байгаа ч ийнхүү олж чадахгүй арав дахь хоногтойгоо золгож байна.

ШШГЕГ-ын цагдан хорих байрнаас хоригдол оргодог тохиолдол ийнхүү гарсаар, эрэн хайх ажиллагаа үр дүнгүй байсаар байна. ШШГЕГ нь Хуульзүйн яамны харьяа газар бөгөөд салбарын хариуцлага энд яригдах ёстой. Учир нь долоо хоногт хоёр удаа бөөрний аппаратад орж эмчилгээ хийлгэдэг өвчтэй хоригдол оргосон үедээ эмнэлгийн үйлчилгээ авч чадаж байгаа эсэх, амь насанд нь эрсдэл үүссэн эсэх, нөгөө талаас оргодол нийгэмд аюул учруулахгүй байх баталгаа хэнд ч байхгүй юм. Тиймээс салбар яам, ХЗДХ-ийн сайд Ц.Нямдорж та салбар газрынхаа ажилд анхаарлаа хандуулах шаардлага байна.