АНУ-аас харьяат иргэдээ татаж аваагүй улсуудын эсрэг хориг арга хэмжээ авна

Шинэ коронавирусийн өвчлөлтэй холбоотой нөхцөл байдал АНУ-д өдөр ирэх тусам хурцдаж байна. Иймд хүчтэй шүүмжлэлд өртсөн тус улсын эрх баригчид байдлыг өөрчлөхөөр янз бүрийн арга хэмжээ авч эхэлсэн. Хамгийн сүүлд гэхэд Ерөнхийлөгч Трамп нь Америкаас иргэдээ татаж авахаас зайлсхийж байгаа улс орнуудын эсрэг визийн хориг арга хэмжээ авах меморандумд гарын үсэг зуржээ.

Тус меморандумд “АНУ-ын нутаг дэвсгэр дээр өөрийн иргэн, харьяат эсвэл байнга оршин суудаг хүмүүсийг SARS-CoV-2 коронавирусээр үүсгэгдсэн цар тахлын үеэр буцаан хүлээн авахгүй байгаа эсвэл үндэслэлгүйгээр хойшлуулж байгаа улс орнууд нь америкчуудад зориулсан нийтийн эрүүл мэндийн салбарт хүлээн зөвшөөрөх боломжгүй өндөр эрсдэл үүсгэж байна. АНУ нь АНУ-ын хуулийг зөрчсөн гадаадын иргэн ба харьяат нарыг буцаах боломжтой байх ёстой” гэж дурджээ.

Энэхүү меморандумын дагуу АНУ-ын Дотоод аюулгүй байдлын сайд нь иргэдээ татаж авахгүй байгаа улс орнуудын жагсаалтыг Төрийн нарийн бичгийн даргад гарган өгснөөс долоо хоногийн дотор Төрийн нарийн бичгийн дарга нь визийн хориг арга хэмжээ авах төлөвлөгөөг хэрэгжүүлж эхлэх ёстой аж.

Жон Хопкинсын нэрэмжит их сургуулиас гаргасан мэдээгээр АНУ-д коронавирусийн улмаас халдвар авсан хүний тоо 499 мянга 252 болоод байгаа. Энэ өвчний улмаас нас барсан хүний тоо 18 мянга 637 болсон бол эдгэрсэн тохиолдол 28 мянга 790 болжээ.