Төв аймгийн Алтанбулаг суманд хэсэгчлэн хөл хорио тогтоолоо

  "Covid-19"  вирусын халдвартай  Франц улсын иргэнтэй хамт  нэг  онгоцоор ирсэн  хоёр иргэн Төв аймгийн Алтанбулаг суманд байрлах "Хустайн байгалын цогцолбор газар"-т байгалын зураг авч,  нутгийн айлуудад хоногложээ.  Тодруулбал Увс аймгийн Бөхмөрөн сумын Ямаат гэдэг газар тусгаарлагдсан  67 настай,  Англи улсын иргэн  Монголд ирэнгүүтээ буюу   3-р сарын 03-ны  Төв аймгийн  Аргалант, Алтанбулаг сумын нутагт байрлах "Хустайн нуруу"-нд байгалын зураг авахдаа тус сумын нэг айлд хоножээ.

  Мөн "сovid-19"  халдвар тээгч Франц улсын иргэнтэй хамт ирсэн өөр нэгэн  Франц улсын иргэн нь мөн Хустайн нуруунд долоо хоносон байна.   Ингэхдээ тухайн хоёр иргэн тус  сумын гуравдугаар багийн айлуудаар  оржээ. Тиймээс Төв аймгийн Онцгой комисс өчигдөр шөнө  хуралдаж  Алтанбулаг суманд  хэсэгчлэн хөл хорио тогтоожээ.   Англи, Франц улсын  иргэний орсон айлуудын хүмүүсийг гэрийн хорионд оруулж, шинжилгээ аваад эхэлсэн байна.   Өчигдөр тус сумын зургаан иргэнээс  шинжилгээ авсан бөгөөд маргааш шинжилгээний хариу гарах юм байна.  Одоогийн байдлаар тус сумын иргэдээс халуурсан шинж тэмдэггүй, урьдчилан сэргийлэх чиглэлээр тус арга хэмжээг авчээ.