Тодруулга: Франц иргэний нэгдүгээр зэргийн хавьтагч халуураагүй даралт нь өссөн

Коронавирусын халдвар авсан нь шинжилгээгээр батлагдсан Франц иргэнтэй хамт нэг онгоцоор, зэрэгцээ суудалд зорчиж ирсэн Англи улсын, 67 настай иргэн Увс аймагт байгаа талаар бид мэдээлсэн.   Тодруулбал, тэрбээр 03.02-нд Улаанбаатарт ирээд, 05-ны өдөр Улаангом хотод очсон байна. Тэрбээр гэрэл зурагчин бөгөөд тухайн ажлаар явж байгаагаа хэлсэн байна. Тэрбээр Бөхмөрөн сумын Ямаат гэдэг газар байгаа бөгөөд тэнд нь тусгаарласан гэж тус аймгийн онцгой комиссын дарга мэдэгдсэн. Дөнгөж сая буюу 2020 оны гуравдугаар сарын 11 нд 12:00 цагт Увс аймгийн Засаг Дарга Д.Батсайхантай утсаар холбогдож тодрууллаа.

-Францын иргэнтэй хамт нэг эгнээнд хажууд нь зорчиж явсан Англи улсын иргэний биеийн байдал ямар байна вэ? 

- Манай эмч мэргэжилтэнгүүд өчигдөр шөнөжин явсаар дөнгөж сая тус иргэнтэйгээ уулзаж шинжилгээ авлаа. Учир нь тус иргэний байгаа газарт их хэмжээний цас орсон зорчиход бэрх байна. Тухайн иргэний биеийн байдал хэвийн халуурсан шинж тэмдэггүй байна. Харин сэтгэл санааны хувьд өөрчлөлт орж даралт нь өссөн байдалтай байгаа юм.

- Сорьцыг хэзээ нааш нь буюу Улаанбаатар хотруу хүргэх вэ? 

- Бид Улаангомд яг одоо машин бэлдчихсэн, онцгой комиссын бичгээ гаргачихсан байна. Бөхмөрөн сумаас сорьцыг ирвэл шууд аваад гарна. Улаанбаатар хотруу 24 цаг явна, очоод 20 цаг хүлээнэ. Түүний дараа шинжилгээний хариу гарна. 

- Англи улсын иргэн одоо хаана байгаа вэ? 

-  Увс аймгийн Бөхмөрөн суманд хөдөө хээр тусгаарласан байдалтай байгаа. Түүнтэй уулзсан, хавьтсан 50 гаруй хүнийг мөн тусгаарлаж, ажиглалтад аваад байна.