ЭМЯ: Өнөөдрийн байдлаар 497 хүнийг ажиглалтад аваад байна

Өнөөдрийн /2020.03.07/ шинэ коронавирусийн халдварын талаарх ЭМЯ-ны ээлжит мэдээллийн үеэр тус яамны Эрүүл мэндийн тусламж, үйлчилгээний газрын дарга Я.Буянжаргал дараах мэдээллийг өглөө. Тэрбээр, “Манай Тохиолдлын удирдлагын тогтолцооны баг уртасгасан цагаар ажиллаж байна. Маргааш болон УОК-ын хуралд оруулах асуудлаа хэлэлцэж байна” хэмээн онцлоод, цааш “Өнөөдрийг хүртэл нийт 883 иргэнийг тусгаарлаж, ажиглалтад авсан. Одоогийн байдлаар 497 хүн ажиглалтад байна. Өчигдөр Истанбул-Москва-Улаанбаатар чиглэлийн нислэгээр ирсэн 129 иргэнээс сэжигтэй хоёр иргэнийг “Асралт Мед” эмнэлэгт, нэг иргэнийг ХӨСҮТ-д тусгаарласан. Мөн “Истанбул-Улаанбаатар” чиглэлийн нислэгээр ирсэн 217 хүний зургааг ажиглалтад шилжүүлэх төлөвтэй байна. Учир нь тэд Өмнөд Солонгос болон Япон улсад зорчсон түүхтэй байгаа. Мөн БНСУ-ын Инчоны нисэх буудлаас транзит хийсэн 31 иргэнд үзлэг хийж байна. Сэлэнгийн боомтоор орж ирсэн нэг хүнийг тусгаарлаж, ажиглалтад авсан. Эмнэлгийн тусламж, үйлчилгээ хэвийн явагдаж байна” гэлээ.