Л.Оюун-Эрдэнэ: АН Зугтаад явчихсан Ц.Элбэгдоржоо, Ч.Сайханбилэгээ олж ир

ЗГХЭГ-ын дарга Л.Оюун-Эрдэнэ:

-Төрийн албанд ажиллаж байсан экс дарга нарынхаа учрыг олохгүй бол болохгүй нь ээ. Ерөнхийлөгчийн тамгын газрын дарга байхдаа нэг асуудлыг огт өөрөөр ярьдаг. Гараад Ардчилсан намын даргын ахлах зөвлөх болонгуутаа өөрөө төрийн нууцтай холбоотой асуудлуудыг гаргаж тавиад, өөрөө мэдэхгүй юм шиг улс төр хийдэг. Их хурлын дарга байхдаа Эрдэнэтийн 49 хувийг мэдэхгүй гээд байдаг. Энэ бол худлаа. Сайханбилэг хийсэн гээд яваад байдаг. Ингэж болохгүй ээ. Коронавирусээс болоод улс төр хийх цаг бидэнд алга. Үүнийг сөрөг хүчин ойлгож харах ёстой. Стратегийн орд газруудыг хууль бусаар олгохтой холбоотой оролдлогууд дээр эцэслэн цэг тавья гэж Ардчилсан нам бодож байгаа бол зугтаад гараад явсан Цахиагийн Элбэгдоржийг олж ир. Өөрийн чинь намаас сонгогдоод явж байсан Сайханбилэг гэдэг хүнээ олж ир. Ийм хүмүүс нь гадагшаа хил даваад зугтчихдаг зүйл байж болох уу? Нэг зүйлийг хариуцлагатайгаар хэлье. У.Хүрэлсүхийн Засгийн газар ямар нэг байдлаар хууль бус зүйл хийхгүй. Үүн дээр олон нийт, ард түмэн бидэнд итгэж болно. Бид хэзээ ч Засгийн газрын хуралдаанаар оруулалгүйгээр Дубайн гэрээг ганцаараа үзэглэх эрсдэл хийхгүй. Бид хэзээ ч Тавантолгойн орд газрыг хууль бусаар урд хөршүүдэд зарах нууц тохироог хийхгүй ээ. Бид хэзээ ч Эрдэнэтийг 49 хувийг УИХ-аар оруулахгүйгээр төрийн мөнгөөр аваад хувийн компанид өгөх ажлыг хийхгүй. Бид хэзээ ч ил тодын тухай хууль хийгээд Монгол улсыг саарал жагсаалтад оруулах байдлыг гаргахгүй. Өнөөдөр макро эдийн засгийн үзүүлэлтүүд сайжирч байгаа. Төрийн сахилга бат сайжирч байна. Ардчилсан намын арчаагүй дөрвөн жилийн алдаа, завхралыг залруулах гэж үйлээ үзэн ажиллаж байна.

Хэрэв мэтгэлцэх гэж байгаа бол мөрийн хөтөлбөрөөр. Хэрэв мэтгэлцэх гэж айгаа бол шийдлээр. Хэрэв мэтгэлцэх гэж байгаа бол өнөөдрийн нөхцөл байдлаас яаж гарах вэ гэдэг дээр улс төр хийгээч ээ. Тэгэхээр сөрөг хүчний нөхөд дээгүүрээ суудлаа олмоор байна.

Тэгээд энэ зөвлөмж ил болохоор энэ хүн яагаад мэдэн будилж яриад байгаа гээд бүх зүйл ойлгомжтой болно оо.

-Өнөөдөр ҮАБЗ-ийн нарийн бичгийн дарга А.Гансүхэд ҮАБЗ-ийн 2018 оны  3321 дугаартай зөвлөмжийг Төрийн болон албаны нууцын тухай хуулийн 19.1 заалт, ЗГ-ын 2017 оны 247 тогтоолоор баталсан МУ-ын төрийн болон албан нууцыг хамгаалах нийтлэг журмын 3.5-д заасны дагуу ил болгох саналыг оруулах гэж байна. Одоохондоо нууц болохоор нарийн зүйлийг нь дараа нь ярья. Гэхдээ “Таван толгойн нүүрсний орд газрын талаар авах зарим арга хэмжээ” гээд ЗГ-ын 2018 оны долоодугаар сарын 9-ний өдрийн тогтоол гарсан. Энэ тогтоол дээр ҮАБЗ-ийн 2018 оны  3321 дугаартай зөвлөмжийг үндэслэн гэсэн байгаа. Энд Тавантолгойн төмөр замтай холбоотой дэд бүтцийг хөгжүүлэх зөвлөмж гарсан. Энэ зөвлөмжийг 2018 буюу хоёр жилийн өмнө гаргасан. Тэгээд ҮАБЗ-тэй ажлын шугамаар хамгийн ойр ажилладаг хүн бол Ерөнхийлөгчийн Тамгын газрын дарга байдаг. Харин ЗГХЭГ нь харин ҮАБЗ-ийн зөвлөмжийн хуралд тэр бүр суугаад байдаггүй. Ингээд тамгын газрын дарга байснаас хойш хоёр жилийн хугацаа өнгөрсөн байна. Хоёр жилийн хугацаанд үнэхээр буруу гэж бодсон юм бол Ерөнхийлөгчийн институци манлайлах үүрэг гүйцэтгэсэн.