Жолооч нараа, автомашиныхаа эргэн тойрон болон доогуур нь шалгасны дараа хөдөлгөөнөө эхлүүлээрэй

Насанд хүрэгсэд, тэр дундаа эцэг эхчүүдийн анхаарал болгоомжгүйгээс хүүхэд ахуйн осолд өртөж, эрүүл мэнд, амь насаараа хохирох тохиолдол гарсаар байна.

Өнгөрсөн сарын 23-ны өдөр Дорнод аймгийн Матад суманд иргэн Э гэрийнхээ хашаанд “Pick Up” маркийн машинаараа ухарч байгаад  өөрийнхөө хоёр настай охин Н-ийг дайрч, амь насыг нь хохироосон харамсалтай хэрэг гарчээ. Мөн хоёрдугаар сарын 25-ны өдөр тус аймгийн Баян-Уул сумын иргэн Д мөн л автомашинаараа ухарч байгаад таван настай хүүгээ дайрч, амь насыг нь хохироосон байна.

Иймд цагдаагийн байгууллагаас автомашинаар хөдөлгөөн эхлүүлэхдээ ямагт автомашинаа тойрч шалгах, доогуур нь шалгаж хөдөлгөөнөө эхлүүлж байхыг анхааруулж байна. Хүүхдүүд автомашины аль нэг талд эсвэл доогуур нь тоглох гэж ороод ийнхүү хохирох тохиолдол гарсаар байгаа юм.