ШШГЕГ-ын 461-р хорих анги Хурандаа Ж.Энхтайваны гахайны байр уу?

Дэлхий даяар коронавирусийн халдвараас сэргийлэх чиглэлээр ажиллаж, хичээж байна. Үүнтэй холбогдуулан тэжээвэр амьтанд үзлэг, ариутгал халдваргүйжүүлэлт хийж байгаа. Гэтэл дарга эзнийхээ “баавар”-аар халдваргүйжүүлэлтээс ангид 20 гахай нийслэлд байна. Тэдгээр гахайнуудыг төрийн тусгай хамгаалалттай ШШГЕГ-ын харьяа 461-р хорих ангийн хашаанд тэжээж, хамгаалж, өсгөн үржүүлж байна.

Хамгийн том асуудал нь эдгээр гахайнууд хувийн өмчийнх. Тодруулбал, тус хорих ангийн дарга хурандаа Ж.Энхтайван болон ерөнхий нягтлан дэд хурандаа Н.Отгончимэгийн гахайнууд.

Ж.Энхтайван хурандаа 461-р ангийн даргаар томилогдон ирэхдээ тухайн гахайнуудаа Булганаас ачиж ирээд шөнөөр хорихын хашаанд оруулжээ. Тэр үеэс хойш тухайн гахайнуудыг хоригдол болоод алба хаагчдын хоолны үлдэгдлээр тэжээж, өсгөж байна. Ирсэн даруйдаа 24 тоорой өвчилсөн учир алба хаагчдаараа нядлуулаад, хорихын хашаанд булуулжээ. Гахайнуудыг тэжээж, адгуулдаг тусгай хоригдлыг ч томилсон байна.

Ж.Энхтайван хурандаа Шинэ жилийн баярын үеэр хэд хэдэн тооройг алба хаагчдаараа нядлуулж, шаруулаад авч явсан байна. Төрийн тусгай хамгаалалттай хорих байр нэг хурандаагийн гахайн хашаа болчхоод байна, ШШГЕГ, ХЗДХЯ-ны дарга нар аа! Халдварт өвчнөөс сэргийлж буй энэ цагт “эзнээрээ хамгаалуулсан” 20 гахайнд мал эмнэлгийн байгууллага ч үзлэг шинжилгээг хийж, өвчин гарах эрсдэлээс хамгаалах биз ээ. Бид энэ асуудлыг эргэн сурвалжилна.