Хүнс, хөдөө аж ахуй, хөнгөн үйлдвэрийн сайд Ч.Улаан: Махны үнэн дээр донсолгоо доргио үүсэхгүй

Засгийн газрын хуралдаанаас гаргасан шийдвэрийн талаар Хүнс, хөдөө аж ахуй, хөнгөн үйлдвэрийн сайд Ч.Улаан мэдээлэл хийлээ. Тэрээр:

-Дэлхий дахинд коронавирусийн тархалт тун эгзэгтэй болж байна. Иймд экспорт, импорт хязгаарлагдаж байна. Ард иргэдийг үнийн хөөрөгдөлтөөс хамгаалах нь ЗГ-ын тэргүүн зорилт. 100 хувь импортоос хамааралтай будаа, тос зэрэг бүтээгдэхүүн байна. Ийм бүтээгдэхүүний татварыг 6 сар хүртэл тэглэж байна. Энэ хуулийг хэлэлцээд УИХ-д өргөн барихаар шийдлээ. Тэр болтол импортлогчдын ажлыг хөнгөвчлөх үүднээс татварыг хоёр сараар ухрааж тооцож байгаа.

-Гурил гэхэд жилдээ 225 мянган тонн хэрэгцээтэй. Үүнээс 300 мянган тонн буудай хэрэгтэй. Манайх 240 мянган тонн буудай тушаасан. Иймд манайд 60 мянган тонны буудан хэрэгцээ гарсан. Коронавирустэй холбоотойгоор зайлшгүй хүнсний бүтээгдэхүүн дээр нөөц бүрдүүлэх шаардлагатай болсон. Улирлын хэрэгцээг хангаж чадах нөөцтэй байх ёстой гэж үзсэн. Иймд ахин 100 мянган тонн буудай оруулж ирэхээр болсон. Тендер зарласан. 3-р сарын 6-нд нээгдэнэ.

-Махаар 100 хувь өөрсдөө өөрсдийгөө хангах боломжтой. Улсаас 12мянган тонн нөөцийн мах бэлдсэн. Махны экспорт хязгаарлагдсан. Хорио цээр тавигдахаар албан ёсоор махаа бэлдсэн үйлдвэрүүдэд зөвшөөрөл олгоно. Экспортод мах гаргах зөвшөөрөлгүй, итгэмжлэгдээгүй газруудад нэлээд хэмжээний мах байна. Энэ махыг экспортод гаргахгүй тул дотоодын зах зээл дээр борлуул гэсэн чиглэл өгсөн. Махны үнэн дээр донсолгоо доргио үүсэхгүй.

-Улаанбаатар хотод гэхэд өдөр тутам 100-н тонноос багагүй махыг тогтмол нийлүүлж чадна.

-Бүх төрлийн будаануудыг 100 хувь импортоор авдаг. Эдгээр бүтээгдэхүүний нөөцтэй байх шаардлагатай. Өнөөдрийн байдлаар 3 сарын бэлэн нөөц байна. Энэ нөөцийг нэмэгдүүлэх ёстой гэж үзсэн тул татварыг тэглэх замаар оруулж ирэх хэмжээг нэмэгдүүлэхээр боллоо. Ингэвэл будааны хувьд 4-5 сарын нөөцтэй болно.

-Элсэн чихрийн 1,5 сарын нөөцтэй. Удахгүй орж ирэхийг багтаан оруулбал 3 сарын нөөцтэй болно.

-Хуурай сүүг импортлохоос өөр аргагүй байдаг. Оны эхнээс 4000 тонныг импортлох зөвшөөрөл өгсөн. Нөөц бий болгохын тулд 2000 тоннын тендер зарласан. Ялагч нь өнөө маргаашгүй тодрох байх.

-Ургамлын тос 100 хувь импортын бүтээгдэхүүн. Бид 3 сарын нөөцтэй. Иймд нөөцөө нэмэгдүүлэхийн тулд татварыг чөлөөлсөн.

-Найман нэрийн бүтээгдэхүүний хэрэгцээ хангамжийг тогтвортой байлгахад онцгой анхаарч байгаа. Бүх аймгууд хүнсний бүтээгдэхүүний нөөцөө тогтоогоод, хүнсний хуулийн дагуу ажиллаж байна. Ямар нэгэн хэлбэрээр хомсдол үүсгэхгүй байх дээр ЗГ онцгой анхаарч байгаа тул 3-4 сардаа ямар ч хомсдол үүсэхгүй гэдгийг баталгаатай хэлж болж байна. Үүн дээр төр засгийн хяналт оролцоо зайлшгүй шаардлагатай.