ЭМЯ-аас Сovid-19 вирустай холбоотой нөхцөл байдал, авч хэрэгжүүлж байгаа арга хэмжээний талаар мэдээлэл хийлээ

ЭМЯ-аас коронавирусийн нөхцөл байдлын талаар ээлжит мэдээллийг өглөө. Хэвлэлийн хурлын үеэр ЭМЯ-ны Олон нийттэй харилцах, тандалт шуурхай удирдлагын хэлтсийн дарга Д.Нарангэрэл нь Covid-19 өвчин дэлхийн 76 оронд бүртгэгдээд байгаа тухай болон БНСУ, Иран, Итали, Герман зэрэг улсуудад өвчин голомтолж, нэлээд эрчимтэй тархаж байгааг дуулгаад дэлхийн улс орнууд тус бүртээ дэгдэлтийг зогсоох өвөрмөц арга хэмжээ авч байгааг онцлов. Тухайлбал, Польш улс гэхэд зөвхөн зургаан сар үйлчлэх хууль коронавирусийн эсрэг хууль баталсан. Европ, Арабын орнууд тэврэлдэх, үнсэлдэх, хамраараа шүргэлцэх зэрэг мэндлэх, гар барихаас зайлсхийж, нэгнээ 1 метийн зайнаас  мэндчилж байх зөвлөмж тарааж эхэлсэн. БНХАУ-д өвчлөл эрчтэй буурч байна. Иймд Өмнөд Солонгос, Иран, Итали зэрэг улсуудаас ирж байгаа хүмүүсийг 14 хоног тусгаарлаж байх шийдвэр гаргасан гэдгийг дуулгалаа.

Үүний дараа ДЭМБ-ын мэргэжилтэн О.Анхтуяа нь тус байгууллагын зүгээс авч байгаа арга хэмжээ ба дэлхийн нөхцөл байдлын талаар мэдээлэл өглөө. Тэрээр:

-Лэлхийн хэмжээнд Covid-19 өвчний нийт 90 мянга 870 тохиолдол бүртгэгдсэн тухай мэдээлэв. Мөн сүүлийн 24 цагийн дотор найман улсад халдвар шинээр бүртгэгдсэн. Хятад улсад сүүлийн 24 цагт 130 шинэ тохиолдол бүртгэгдсэн нь нэгдүгээр сарын 20-оос хойш бүртгэгдсэн хамгийн бага үзүүлэлт болсон байна. Шишнэ тохиолдлуудын 80 хувь нь Өмнөд Солонгос, Иран, Итали гэсэн гурван улсад гарч байна. Covid-19 өвчнийг шинж тэмдэг илэрсэн хүмүүс тарааж байгаа гэдгээрээ ялгаатай. Албан ёсоор бүртгэгдсэн тохиолдлуудын ердөө 1 хувь нь шинж тэмдэггүй байсан. Гэхдээ Covid-19 өвчнийг хязгаарлаж, тархалтыг нь таслан зогсоох боломжтой гэдгээрээ улирлын томуунаас ялгаатай. ДЭМБ-аас хувийн хамгаалах хэрэгслийг зөв, зохистой хэрэглэх талаар удирдамж, заавар гаргасан тухай мэдээлэв.

ЭМЯ-ны Эмнэлгийн тусламж үйлчилгээний газрын дарга Я. Буянжаргал:

-ОХУ-аас туршлага судлах, суралцах, түргэвчилсэн оношлуурыг нийлүүлэх хүсэлт тавихаар Эрүүл мэндийн дэд сайдаар ахлуулсан  багийг явуулахаар болсон. Маргааш ДЭМБ-ын шугамаар ирж байгаа ачааг Туркийн онгоцоор хүлээн авна. Нэгдүгээр сарын 9-өөс хойг 840 тохиолдлыг ажиглалтад авсан. Яг одоо 461 хүн ажиглалтад байна. ХӨСҮТ, Цэргийн төв эмнэлэг, Асралт мэд гэх зэрэг газруудад хүмүүсийг авсан.

Зоонозын өвчин судлалын төвийн ерөнхий захирал Н.Цогбадрах:

-Коронавирус нь амьтны гаралтай вирус учраас Зоонозын төв энэ вирусийн талаарх бүх шинжлэх ухааны мэдээллийг судлан танилцаж, холбогдох бүх байгууллагуудыг мэдээллээр хангаж ирсэн. Эндээс хамгийн чухал нь эрүүл мэндийн салбарын ажилтнуудыг сургах ажлыг зохион байгуулсан явдал. Зоонозын төвөөс 20 гаруй удаагийн сургалт явуулж, 3000 гаруй эмнэлгийн ажилтнуудыг хамруулсан.

МХЕГ-ын хэлтсийн дарга Д.Баярболд:

-МХ-ын байгууллага өндөржүүлсэн бэлэн байдалд ажиллаж байна. Системийн хэмжээнд 2200 албан хаагч ажиллаж байгаагаас 1650 улсын байцаагч байна. Нүүрсний экспортыг гуравдугаар сарын 15-аас эргэн сэргээхээр болсон тул холбогдох боомтуудад ажиллах улсын байцаагчдын бэлэн байдлыг хангасан.