Ч.Хүрэлбаатар: НДШ-ийн алдангийг авахгүй, түрээсийн төлбөрийг нэг удаа чөлөөлнө

Засгийн газраас коронвирусээс сэргийлэх өндөржүүлсэн бэлэн байдлын үед хэрэгжүүлэхээр шийдсэн арга хэмжээний талаар Сангийн сайд Ч.Хүрэлбаатар мэдээлэл өгөв. Тэрээр:

-Өмнө нь хүнсний бүтээгдэхүүний үнийг тогтвортой болгохын тулд хил дээр авдаг татваруудыг хойшлуулж, дараа нь хойшлуулсан хэмжээгээр чөлөөлөх хуулийг УИХ-д өргөж шийдвэрлүүлэхээр болсон байсан. Харин өнөөдөр 8-9 заалт бүхий ЗГ-ын тогтоолыг баталлаа.Үүнд:

1.Эрүүл ахуйн, халдваргүйжүүлэх горимыг хангаад газрын тос, нүүрсний экспортыг эхлүүлэхээр болсон. Энэ бол жолооч нь хамгаалалтын хувцастай, машин нь ариутгалын нөхцөлтэй, хилээр гарсан бол тэр өдөртөө буцаж ирсэн байх зэрэг зохион байгуулалтыг хийнэ гэсэн үг.

2.Өндөржүүлсэн бэлэн байдлын хугацаанд НДШ-ийг төлж чадаагүй тохиолдолд оногддог алданги, торгуулийг авахгүй. Үүнийг шийдэх хуулийг УИХ –д өргөн барьж шийдэх шийдвэр гарсан.

3.Өндөржүүлсэн бэлэн байдлын хугацаанд хамаарах татвараас нэг удаад чөлөөлөх заалтыг оруулж ирсэн.

4.Өндөржүүлсэн бэлэн байдлын хугацаанд татвар төлөгчид ногдуулсан түрээсийн орлогыг 1 удаа чөлөөлөх хуулийг өргөн барихаар болсон. Гэхдээ энэхүү хорио цээрийн хугацаанд түрээсийн төлбөрөө бууруулсан түрээслэгчид л энэхүү хуульд хамрагдахаар болсон. Түрээсийн төлбөрөө буулгаагүй хувийн хэвшлийг түрээсийн орлогын татвараас чөлөөлөхгүй. Ингэснээр хувийн хэвшлүүдэд заах биш харин эдийн засгийн аргаар нөлөөлөх нь зүйтэй гэж үзсэн.

5.Улсын болон орон нутгийн төсвөөс авлагатай тохиолдолд татварын өртэй нийцүүлэн суутгах боломжийг бүрдүүлж өгсөн.

6.Төсвийг тодотгохгүй гэдгийг дахин хэлье.

Нэг жилийн хүндрэл бэрхшээлийг даван туулах хэмжээний боломж нөөцийг Засгийн газар бүрдүүлсэн байгаа.