Сэжигтэй тохиолдлын зочилсон 1 айл, тухайн айлд ирсэн 4 өрхөд хөл хорио тогтоолоо

Багануур дүүрэгт COVID-19 сэжигтэй тохиолдол өнөөдөр бүртгэгдсэн. Тухайн иргэн ирсэн өдрөө Налайх дүүргийн 8-р хороонд оршин суух эгчийндээ орсон бөгөөд тус айлд зочилж ирсэн дөрвөн айлыг тандалт судалгаагаар илрүүлэн хэсэгчилсэн хөл хорио тогтоогоод байгаа талаар Налайх дүүргийн Засаг даргын Тамгын газраас мэдээллээ.

                   Одоогоор хөл хорио тогтоосон айл өрхийн гишүүдэд ямар нэгэн өвчний шинж тэмдэг илрээгүй

Сэжигтэй тохиолдлоор бүртгэгдээд буй Багануур дүүргийн иргэн хоёрдугаар сарын 22-ны өдөр БНСУ-аас ирсэн ба хоолой нь өвдөж, өнөөдөр өөрөө эмнэлэгт хандсанаар тус дүүргийн Эрүүл мэндийн төвөөс яаралтай тусгаарлан, шинжилгээ авч ХӨСҮТ-д хүргүүлжээ. Багануур дүүргийн иргэний шинжилгээний хариу маргааш гарна.

Одоогоор хөл хорио тогтоосон айл өрхийн гишүүдэд ямар нэгэн өвчний шинж тэмдэг илрээгүй. Коронавирусын халдвараас урьдчилан сэргийлэх зорилгоор зарим айл өрх, байранд ийнхүү яаралтай хөл хорио тогтоосон гэдгийг зөвөөр ойлгож, хуурамч мэдээлэлд автахгүй байхыг НДЗДТГ-аас хүссэн байна.

Мөн онцын шаардлагагүй бол гэрээсээ гарахгүй байх, амны хаалтаа тогтмол зүүх, гараа маш сайн угааж, ариутгахыг зөвлөлөө.