Хөдөлмөр, нийгмийн хамгааллын сайд С.Чинзориг: АТГ өөрийгөө өгч шалгуулахаар боллоо

Хөдөлмөр, нийгмийн хамгааллын сайд С.Чинзориг нь НДС-ийн өмнөх удирдлагыг хуулийн байгууллагууд шалгаж байгаа асуудалтай холбоотой тайлбарыг хэвлэл мэдээлэлд өглөө. Тэрээр: 

-Миний өмнө сайдаар ажиллаж байсан хүнийг НДС-тай холбоотой шалгаж, түр саатуулж байгаа тухай яриа их явах болсон. Зарим нь НДС-ийн мөнгө алдагдсанд С.Чинзориг буруутай мэтээр ярьж байна. Тухай бүрд тайлбар өгч байсан ч гүтгэлэг тасрахгүй байна. Янз нь сонгууль дуустал тасрахгүй шинжтэй, миний болон байгууллагын нэр төрийг үргэлжлүүлэн гүтгэсээр байх юм шиг байна. Саяхан намайг прокурорын газраас яллагдагчаар мөрдөн шалгахаар боллоо гэсэн цуурхал тараасан байна. Би АТГ-д хандан эрх ашгийн зөрчил байгаа эсэх, бусдад давуу байдал олгосон зүйл байгаа эсэхийг шалгаж өгөх хүсэлтийг гаргасан. Төрийн өндөр албан тушаалтнууд элдэв хэрэгт холбогдоод чимээ тасардаг. Иймд би үүнийг нэг мөр цэглэхийн тулд өөрийгөө шалгуулаад үнэн худлаа шалгуулахаар боллоо.

Мөн намайг прокуророос яллагдагчаар татсан гэсэн гүтгэлэг явж байна. Иймд Ерөнхий прокурорт хандан намайг татсан эсэхийг тодруулж тайлбар өгөхийг хүссэн өргөдөл өгсөн.

Зөрчлийн хуулиар гүтгэсэн этгээдэд оноодог ял инээдэмтэй юм байгаа. Ердөө 2 сая 500 мянгаар торгодог. Одоо ЗГ-аас энэ хуульд өөрчлөлт орсон. Энэ хууль хоёрдугаар сарын 27-оос мөрдөж эхэлнэ. Одоо шинэ хуулиар эрүүгийн хуулиар мөрддөг болсон. Иймд зарим нь шинэ хууль үйлчилж эхлэхээс өмнө гүтгээд 2,5 саяар торгуулъя гэж бодож байна гэж харж байгаа. Иймд ЦЕГ-т Зөрчлийн хуулиар үнэнийг тогтоож өгөх хүсэлтийг гаргасан. Энэ гүтгэлгийг зайлшгүй ЦЕГ-аар шалгуулах хэрэгтэй гэж үзсэн.

Бямбабаатар Монгол гэсэн хаягаас намайг яллагдагчаар татлаа гэсэн гүтгэлэг тараасан. Энэ хаягийг жинхэнэ байна уу үгүй гэдгийг шалгуулахаар ТЕГ-ын кибер гэмт хэрэгтэй тэмцэх хэлтэст өгсөн.