Д.Нарангэрэл: Өмнөд Солонгост байгаа манай иргэд халдвараас сэргийлэх зөвлөмжийг сайн биелүүлэх хэрэгтэй

Эрүүл мэндийн яамнаас шинэ коронавирусийн тархалтын дэлхийн нөхцөл байдал болон түүнтэй холбоотой авч байгаа арга хэмжээний талаар ээлжит мэдэээллийг олон нийтэд өглөө. Хэвлэлийн хурлын үеэр ЭМЯ-ны Олон нийттэй харилцах, тандалт шуурхай удирдлагын хэлтсийн дарга олон Д.Нарангэрэл:

-Манайхан олноор зорчдог Өмнөд Солонгос, Япон, Сингапур зэрэг улсуудад өвчлөл эрчимтэй тархаж байна. Өмнөд Солонгост Дэгү хотод сүмийн залбиралд суусан эмэгтэй коронавирусийн халдвар авсан талаар өчигдөр мэдээлж байсан. Тэгвэл энэ эмэгтэйгээс тархсан халдвар 24 цагийн дотор 56 тохиолдол болж нэмэгдээд нийт өвдсөн хүний тоо 154 болсон байна. Өмнөд Солонгосын Сөүл, Дэгү, Чэжү гэсэн хотуудад өвчлөл бүртгэгдсэн. Иймд өвчлөл хамгийн ихээр гарсан Дэгү хотын удирдлагууд олон нийтийн газар, ялангуяа эмнэлгээр явахгүй байх, зайлшгүй эмнэлгээр орох тохиолдолд амны хаалт ашиглах, хоол хүнсээ гүйцэд болгож идэх, гараа тогтмол савандаж угаах, амьсгалын замын өвчтэй хүнээс хол байх, амьсгалын замын өвчний шинж тэмдэг илэрвэл эмнэлэгт яаралтай хандах зөвлөмжүүдийг өгсөн байна. Мөн 1335, 1339 гэсэн утас руу залгаж зөвлөмж авах боломжтойг иргэддээ сануулжээ. Манай 40 мянга гаруй иргэд Өмнөд Солонгост амьдарч байгаа. Тэд Өмнөд Солонгосын эрүүл мэндийн яамнаас гаргасан эдгээр зөвлөгөөг ягштал дагаж мөрдөх хэрэгтэй. Ер нь болж өгвөл өвчлөл гарсан 27 оронд очихгүй байхыг зөвлөж байна. Очвол 14 хоног гэртээ сайн дураар тусгаарлахыг зөвлөж байна гэлээ.