Баримт: Товч.мн-ынхны хөлөглөж явсан ТӨК-ийн 62-05 УБЭ автомашины бичлэгийг дэлгэж байна

62-05 УБЭ машинд Товч.мн сайтын хоёр сэтгүүлч, хоёр зураглаач сууж явсан. Эднийг "Мэдээлэл холбооны сүлжээ" ТӨК-ийн шийдвэрээр тус дөрвөн ажилтныг Говь-Алтайд хүргэж ирсэн байна. Товч.мн сайтын ажилтнуудыг “Энтиум” зочид буудалд буулгасан. Дараа нь машиныг "Мэдээлэл холбооны сүлжээ" ТӨК-ийн Говь-Алтай дах салбарын ар талд байрлах гаражд оруулаад түгжсэн. Энэ байгууллагын нэг нягтлангаас өөр ямар ч хүнгүй учраас биднийг дотогш нэвтрүүлээгүй. Гэтэл манай сайтад туслахыг хүссэн иргэн тухайн машиныг гаражаас гараад Ховд аймгийн зам руу орон зугтаж байгааг мэдээлснээр бид баримтжуулж авсан юм. Үүгээр бид юу хэлэх гэсэн юм бэ? Хэвлэл мэдээллийн хэрэгслийн сэтгүүлчид бид асуудлыг ил гаргаж тавихын тулд тус тусынхаа редакцын бодлогоор ажиллаж байдаг. Гэхдээ аль ч редакц төрийн байгууллагын авто машиныг сурвалжлаг хийхдээ ашиглана гэдэг бол байж боломгүй асуудал. Энд хэвлэл мэдээллийн байгууллагын эздийг гэхээс илүүтэйгээр төрийн байгууллагаас хариуцлага нэхмээр байна. Иргэдийн татварын хөрөнгөөр бүрддэг энэ машины, шатахууныг, жолоочийн цалинг хэн төлж байгаа юм бэ? Бидний татвараар бүрдсэн тэр машиныг яагаад дурын нэг сайт дөрвөн сэтгүүлч хөлөглөөд 1000 км газар давхиж явдаг юм бэ? Төрийн авто  машин яагаад төрийн ажлаа хийхгүй байгаа юм бэ, эрхэм дарга нар аа? Засгийн газрын хэрэг эрхлэх газрын дарга Л.Оюун-Эрдэнэ та албаны автомашиныг аминдаа ашигласан дарга нарыг ажлаас нь халах хүртэл хариуцлага тооцно гэж ярьж байсан. Тэр асуудал чинь ажил хэрэг болохгүй юм уу? Өнөөдөр нэг баримтыг бид гаргаж тавилаа.

Магадгүй энд хардах шалтгаан байна. Говь-Алтай аймгийн Засаг дарга В.Рэнцэндорж албан өрөөндөө архи согтууруулах ундаа хэрэглэсэн байж болзошгүй, хамт байсан эмэгтэй амь насаа алдсан асуудал байгаа. Энэ асуудалтай холбогдуулан В.Рэнцэндорж болон бусад хүмүүсийг шалгаж байгаа. Ийм үед В.Рэнцэндоржийг хамгаалах зорилготойгоор “Мэдээлэл харилцаа холбооны сүлжээ” ТӨК-ийн удирдлагууд Ланд-200 маркийн авто машиныг гарган өгч, хэвлэл мэдээллийн хэрэгслүүдийг 1000 км-т явуулж, сурвалжлаг бэлтгүүлж байгаа нь ямар учиртай юм бэ? Эндээс бид Улаанбаатар хотод очоод хариуцлагыг нэхнэ.