ЭМЯ-аас Сovid-19 вирустай холбоотой нөхцөл байдал, авч хэрэгжүүлж байгаа арга хэмжээний талаар мэдээлэл хийж байна

ХӨСҮТ-ийн Тандалт судалгааны албаны дарга А.Амбасэлмаа:

-Замын-Үүдэд 1 хүн тусгаарлагдсан, 103 хүн ажиглалтад байгаа. Гашуунсухайтад 12 хүн тусгаарлагдсан, 15 хүн ажиглалтад байна. Энэ бүх хүний биеийн байдал сайн байна. Өчигдөр буюу хоёрдугаар сарын 19-нд Завхан аймагт 1 тохиолдол тусгаарлагдсан. Энэ тохиолдол нь хоёрдугаар сарын 6-аас 12-ны хооронд Гашуунсухайтаар БНХАУ руу гарсан. 12-нд орж ирээд 13-нд Завхан аймагт очоод халуурсан, хатгаатай гэж тусгаарлагдсан. Шинжилгээг нь авсан. Хамт автобусанд авсан 40 гаруй хүнийг гэр оронд нь ажиглалтад авсан. ХӨСҮТ-д өчигдөр 1 хүнийг тусгаарласан. Тяньжинд сурдаг оюутан.

ЭМЯ-ны Олон нийттэй харилцах, тандалт шуурхай удирдлагын хэлтсийн дарга Д.Нарангэрэл: 

-ДЭМБ-аас БНХАУ-ын Ухань хотод халдварын тоо цөөрч байгаа ч дэлхий дахинд тархах эрсдэл өндөр байна гэж анхааруулж байгаа. Иймд Цагаан сарын ажиллагааг зөвхөн гэр бүлийн хүрээнд хийх, цахимаар золгохоор хязгаарлах нь зүйтэй. Яагаад гэвэл энэ өвчлөлд хамгийн их эндэж байгаа хүмүүс нь өндөр настан, 60-аас дээш настнууд байна. Жишээлбэл, Япон улсад өндөр настнууд их байдаг учраас энэ өвчин газар их авч байна гэж Японы эрдэмтэн судлаачид үзсэн байна. Иймд Цагаан сараар хамгийн хайртай дотнын аав ээж, өвөө эмээ нараа халдвараас сэргийлэхэд хүн болгон анхаарах хэрэгтэй.