Л.Наранбаатар: 1,3 тэрбумаар кино хийнэ гэсэн байна. Нүүрс үйлдвэрлэдэг компани кино хийх шаардлагагүй

1072 хувьцаа эзэмшигчдийг ногдол ашиг олгох талаар мэдээлэл өгөх хурлын үеэр "1072 хувьцаа эзэмшигчдийн эрх ашгийг хамгаалах холбоо" ТББ-ын үүсгэн байгуулагч Л.Наранбаатар Уул уурхай, хүнд үйлдвэрлэлийн сайд Д.Сумъяабазарт хүсэлт гардуулж өгөхдөө тус компанийн үйл ажиллагаатай холбоотой зарим баримтыг дурдаад хамтарч ажиллах санал хүргүүлэв. Тэрбээр:

"Дөрөвдүгээр сард хувьцаа эзэмшигчдийн хурал болно. Түүнд хувьцаа эзэмшигчдийг оруулаад, нээлттэй явуулж өгнө үү. Хувьцаа эзэмшигчдийн холбооноос гурван хүнийг оруулаад ямар тооцоо судалгаан дээр үндэслээд ийм шийдвэр гаргаснаа танилцуулах саналыг ТУЗ-д тавьж байна. ТУЗ-ийг УУХҮ-ийн яамнаас томилдог. Шийдвэрээ нууцаа гаргадгаа зогсоомоор байна. Илүү нээлттэй хамтарч ажиллах хэрэгтэй байна. Санхүүгийн тайланг ил тод болгож судлаачид танилцах боломжоор хангаач ээ. Өнөөдөр өгч байгаа мэдээллээ бүх хэвлэл мэдээллийн хэрэгслээр нээлттэй тарааж өгнө үү. Ингэвэл судлаачид анализ хийгээд тооцоо хэр бодиттой вэ гэдэгт дүгнэлт хийх боломжтой болно шүү дээ.

Хувьцаа эзэмшигчдийн холбоо нь дөрөвдүгээр сарын хурал болохоос өмнө төсөв дээр нь хяналт тавьсан. 480 тэрбумын хөрөнгө оруулалтаас эдийн засагчид судалгаа хийж байгаад 400 тэрбумыг хасуулсан. Үүнийг 2,5 сая хувьцаа эзэмшигчдэд хуваавал нэгж хувьцаа эзэмшигчид 162 мянган төгрөг болж байна. Хэмнэх зардал. Үүн дээр цэвэр ашиг нэмэгдэхээр бүр ч их болох боломжтой юм. Гэх мэтээр ярих асуудал олон байгаа тул компанийн тайлантай судлаачдыг танилцуулах боломжоор хангаж өгнө үү. Мөн дөрөвдүгээр сард болох хурлыг жижиг танхимд бус харин нээлттэй, онлайнаар эрдэмтдийн мэтгэлцээн маягаар явуулахыг хүсэж байна. Ингэхгүй бол үргүй зардал их байна.

Үргүй зардлаа багасгаач ээ. 1,3 тэрбумаар кино хийнэ гэсэн байна. Нүүрс үйлдвэрлэдэг компани кино хийх шаардлагагүй ээ. 500 сая гаруй төгрөгөөр лого бүхий зүйлс хэвлүүлнэ гэсэн байна. Нүүрс үйлдвэрлэдэг компани нь лого хэвлүүлэх ямар шаардлага байгаа юм бэ? Энэ мэт үргүй зардлыг багасгаач ээ. Бидэнтэй хамтарч ажиллахад нээлттэй байна" гэсний хариуд  Д.Сумъяабазар сайд:

 -Хамтарч ажиллахад бэлэн. Судлаад ярилцах зүйлс бий. Олон улсын аудит оруулах нь компанид цаашдаа хэрэгтэй гэж үзэж байгаа. Таны шаардлагатай танилцаад албан тоотоор албан ёсоор хариулт өгнө гэсэн хариу өгөв.