Б.Дашзэвэгийг 8 сар 9 хоногийн өмнө магадлангаар суллажээ

Монгол Улсын гавьяат зүтгэлтэн, олон улсын тоймч, сэтгүүлч Б.Дашзэвэг өнгөрсөн 2018 онд бага насны охиныг хүчирхийлсэн хэрэгт буруутгагдаж гурван шатны шүүхээс есөн жилийн ял сонссон билээ.

Тэгвэл өнгөрсөн 2019 оны арвандугаар  сарын 25-нд "Хугацааны өмнө тэнсэн суллах" тухай /Хянан магадлан/ шүүгчийн захирамжаар суллагдсан байна.  Тэрбээр ШШГЕГ-ын харьяа 421 дүгээр ангид ял эдэлж байсан юм.

Шалтгааныг тодруулбал,   Улсын Дээд шүүхийн хяналтын шатны эрүүгийн хэргийн шүүх хуралдаанаар Б.Дашзэвэгт холбогдох хэргийг шүүгдэгч, түүний өмгөөлөгч нарын гаргасан гомдлын дагуу 2018 оны зургаадугаар сард хэлэлцээд, “насанд хүрээгүй хохирогчийн хууль ёсны төлөөлөгч болон түүний өмгөөлөгчийн гаргасан ялыг хөнгөрүүлж өгөхийг хүссэн хүсэлт, шүүгдэгчийн 74 настай байдал” зэргийг харгалзан үзэж, Б.Дашзэвэгт оногдуулсан ялыг гурван жил хорих болгон өөрчилсөн байна. Энэ дагуу тэрбээр гурван жилийн ялаа эдлэн, ийнхүү суллагджээ.