Тэргүүн хамба, Д.Чойжамц: Олон нийтийг цуглуулахгүйгээр үрлээ тараана

МБШТөв Гандантэгчэнлин хийдийн тэргүүн их хамба лам, гавж Д.Чойжамц:

-Хувьтай хулган жилийг гэж ч ярьдаг. Гэхдээ бурхны шашны гүн философийн үүднээс авч үзвэл цаг хугацааны үргэлжлэл. Тийм учраас жаргалтай сайхан амьдралын шалтгаанаа тавьж байсан бол сайхан амьдарна гэж бодох хэрэгтэй. Сүсэг бишрэлтэй хүмүүс цаг хугацааг тооцож үздэг. Манайх ч зурхайг хэрэглэж ирсэн. Бидний эцэг өвгөд мянган жилийн тэртээгээс Цагаан сарын тэмдэглэж ирсэн. Монгол хүнийг тодорхойлдог баяр ёслол. 29-нд гэр орноо цэвэрлээд, битүүндээ ширээгээ засаад, 1-нд золгодог. Жилийн хамгийн сүүлийн өдөр хөөрөг зөрүүлж, сэтгэлд үүссэн таагүй зүйлээ үгүй хийдэг. Шинэ жилийн эхний өдрийг баяр баясгалантай угтдаг. Жилийн эхний өдрийг элбэг дэлбэг угтаж жилдээ энэ байдлаа алдахгүй гэдгээ бэлгэддэг.

Бурханы шашин бол нэгнээ хайрладаг, ойлгодог байх нь жаргалтай сайхан амьдрал эх үндэс гэж үздэг. Хэрүүл тэмцэл атаа жөтөөнөөс болж хамгийн муухай юм үүсдэг. Бидний бие одон гарагтай холбоотой, тэдний шүтэн барилдлагатай холбоотой учраас зурхай зурж, засал хийдэг.

Хувь хүний хувьд хөгшчүүдэд эерэг, залуучуудад хатуу, нялхаст анхаарах хэрэгтэй гэж гарсан. Нийгмийн хувьд дээдэст ширүүн, дунд тал руугаа бүр ширүүн гэж гарсан. Бүгд хууль зүйн дагуу явахгүй бол энэ жилдээ хэцүү гэхээр зурлага гарсан. Тариа ногооны хувьд жилийн дундуур хур бороо багатай. Мал сүргээ анхаарах хэрэгтэй гэж гарсан. Энэ бол магадлал. Бие хэл сэтгэл гурваа зөв авч яваа хүнд ажралгүй явдаг.

Дэлхий даяар аймшигтай ханиад томуу гарч. 700 жилийн өмнө судар дээр ирээдүйд сарьсан багваахайнаас гарсан хижиг өвчин гарч зүдрээнэ гэсэн байдаг. Тэнд энэ тохиолдолд ямар эм уух, ном унших талаар бүгдийг бичсэн байдаг.

Засаг төр сайхан арга хэмжээ авч байна. Ард түмэн үүнийг нийтээр хүлээн авах ёстой. Ер нь алдаа хувиа хичээснээс гардаг. Өөрийн ашиг тусыг бодоод гадаад руу явсан үзлээс үүдээд муухай зүйл гардаг. Өөрийгөө гурван сая хүний нэг гэж бусдыгаа бодоод ирэхээр аюул ослоос хол явдаг. Нэг л монгол хүн алдаа гаргахад, ханиаднаас сэргийлэхгүй болгоомжгүй байхад л ханиад ирэх нөхцөл бүрдээд байна.

Гандан хийд тусгай комисс гаргасан. Карантин тогтоох хүртэл амны хаалт олноор тараасан. Аль ч нөхцөлд ажиллаж чаддаг байх хэрэгтэй гэж үзсэн. Цагаан сарыг цуцална гэж байхгүй. Хөл хорио гэх мэт амгалан үгээр хэлээсэй гэж хүссэн. Засгийн газрын шийдвэрийн дагуу ажиллана.

Дээдсийн айлдсан номыг уншиг, утлага хийх, үрэл бүтээж зүүлгэх нь лам нарын хийдэг ажил. Ард түмний шалгарсан аргуудыг бүгдийг нь хийх хэрэгтэй. 100 мянган Дар эхийг унших ажлыг эхлүүлсэн. Энэ бол шашны ажил тул хэнээр ч заалгуулахгүй ард түмний төлөө, сүсэгтэн олны төлөө хийнэ.

Бид аль болох олон хүнийг цуглуулахгүй байх тал дээр зогсож байгаа. Шинэ жилийн засал энэ тэрийг заавал ийм үед яарч хийлгээд хэрэггүй. Энэ бол сайн л бол 1-2 сарын ажил биз. Үүний дараа бид тусгай зохион байгуулаад Цагаан сараар хийдэг гүрэм номыг бид тусгай лам гаргаад уншаад өгье гэсэн уриалга явуулж байгаа.

Олны хөдөлгөөн тасрахгүй байхыг бид мэдэхгүй сүсэгтэн олон мэднэ. Үрлийг аль болох олон хүн шавуулахгүй талаас нь бодож байгаа. Сүсэгтний холбоогоор дамжуулж тарааж магадгүй. Хурал ном хурна. Дайны байдалтай ч бай дөрвөн эрх чөлөө байдаг юм. Шашин шүтлэг бол байнгын байдаг.

Золгооны талаар Гандангийн хэдэн ламтай яриад юу хийх вэ дээ. Энэ талаар ард түмэнтэй ярих хэрэгтэй.