Маргаашнаас эхлэн Монгол Улс - БНХАУ-ын хооронд нислэг, төмөр замын зорчигч тээврийг бүрэн зогсоолоо

Засгийн газар өнөөдөр /2020.02.13/ ээлжит бусаар хуралдлаа. Хуралдаан 15.30 цагт эхэлсэн бөгөөд цаг үеийн асуудлаар шуурхай хуралдаан зарласан юм. Уг хуралдаанаар БНХАУ-аас ирэх бүх нислэг, галт тэрэгний хөдөлгөөнийг зогсоохоор боллоо. Коронавирусээс урьдчилсан сэргийлэх зорилгоор БНХАУ-ын Бээжин, Хөх хот, Эрээн чиглэлийн нислэг, галт тэрэг, тээврийн хөдөлгөөнийг бүрэн зогсоох шийдвэрийг маргаашаас буюу хоёрдугаар сарын 14-нөөс хэрэгжүүлэх аж. Мөн коронавирусын халдвараас сэргийлэх зорилгоор БНХАУ-ын нэг ч иргэнийг Монгол Улсын хилээр нэвтрүүлэхгүй байх шийдвэрийг Засгийн газар гаргалаа. Тодруулбал, тус иргэдийг гуравдагч орноос ирсэн ч улсын хилээр нэвтрүүлэхгүй байхаар шийдвэрлэжээ.

ЗГ-ын өмнөх тогтоол ёсоор сүүлийн 14 хоногийн хугацаанд нийт 6000 монгол иргэнийг урд хөршөөс орж ирсэн. Иймд маргаашаас эхлээд хил 100 хувь хаагдана. Урд хөршөөс аль ч улсын иргэнийг нэвтрүүлэхгүй. Монголын улсын иргэнд хүндэтгэх шалтгаан байвал тухайн үед нь Консулын газрууд, Элчин сайдын яамд ажиллаж байж авчирч тусгаарлах байдлаар чартер нислэгээр авчирна.