Шуурхай: Коронавирусын халдварын талаар ЭМЯ-аас мэдээлж байна

ЭМЯ -ны Нийгмийн эрүүл мэндийн газрын дарга Д.Нарангэрэл нь дэлхийн хэмжээнд халдварын байдал ямар байгааг тодрууллаа. Тэрээр:

-Сүүлийн 24 цагийн дотор 15 мянга 346 тохиолдлоор нэмэгдсэн. Лабораторийн хурдавчилсан аргын нэвтрүүлснээр тохиолдлын тоо нэмэгдсэн. Өчигдөр орой хуурамч мэдээлэл их тарлаа. Хөвсгөл аймагт нас барлаа гэх мэтээр нэг эмэгтэй хуурамч мэдээлэл хүчтэй тараалаа. Байлдааны цагийн онц байдалд шилжлээ, 1-2 сарын хүнсээ нөөцлөөрэй гэх мэт  уриа тараасан гэсэн байна.

Энэ талаар ЦЕГ-ын Нийтийн хэв журмыг хамгаалах газрын дарга, хурандаа П.Эрдэнэбат ярихдаа :

-Цахим орчинд худал мэдээлэл тараадаг, уриалах явдлыг зогсоогооч ээ гэж шаардаж байна. Өчигдөр худал мэдээлэл тараасан Чингэлтэй дүүргийн иргэн Г.-г тогтоогоод шалгаж байна гэв.

ЭМЯ-ын Эмнэлгийн тусламжийн газрын дарга Я.Буянжаргал:

-ДЭМБ-аас өгсөн зааврын дагуу иргэдэд зөв мэдээллийг өгөх чиглэлээр ажиллаж байгаа. Эмнэлгийн үйлчилгээний тусламж үйлчилгээний бэлэн байдлыг хангаж байна. ХӨСҮТ 200 орны бэлэн байдлыг хангаад, сэжигтэй тохиолдлуудыг шалгаад, тусгаарлаад явж байна. Эмч мэргэжилтнүүдийг сургаж байна, эм эмийн хэрэгслээр хангаж байна.

Өдөрт тэдэн хүн тусгаарлалаа, оношилж байна гээд ярьж байгаагийн цаана маш олон тооны эмч, мэргэжилтнүүдийн ажил байна, асар их эм бэлдмэл хэрэглэж байна. Гэтэл тусгаарлагдаж  байгаа иргэд эрүүл мэндийн ажилтнуудыг хэл амаар доромжлох явдал тасрахгүй байна. Баян-Өлгийн тохиолдол дээр жишээ татъя. Маш олон удаа Хятад руу орж гарч яваад Улаанбаатар орж, тэндээсээ Ховд орж, тэндээсээ Баян-Өлгийн орсон. Тэгсэн атлаа өөрийн явсан зам, суусан автобусны талаар ямар ч мэдээлэл өгөхгүй байгаа. Гэтэл энэ хүний сууж явсан бүх автобус унаа, замдаа хоол идсэн газар гэх мэт бүх хавьтлуудыг бид өөрсдөө тодруулсан. Анхааралтай байх хэрэгтэй гэж сэрэмжлүүлсээр атал ийм хариуцлагагүй байдал гаргаж байна.

ХӨСҮТ-ийн захирал Д.Нямхүү:

-Хөвсгөл, Баян-Өлгийн тохиолдол сөрөг гарсан. Дорнодын мөн сөрөг гарсан. Японоос 1000 оношлуур орж ирсэн. Оюутнуудын биеийн байдал сайн байна. Одоо давтан шинжилгээ хийнэ. Тусгаарлах хугацаа нь 15-нд дуусна.

ЦЕГ-ын Нийтийн хэв журмыг хамгаалах газрын дарга, хурандаа П.Эрдэнэбат:

-Хуурамч мэдээлэл тараасан 10 тохиолдлыг шалгаж байна. Тогтоогдвол Зөрчлийн хуулиар 2 сая хүртэл төгрөгөөр торгоно. Цаашдаа эрүүгийн хэрэг ч үүсгэх боломжтой. Арга хэмжээ тооцсон нэг тохиолдол байгаа.