Хамаг амьтны тусын тулд “ҮРЭЛ ТАРААХ АЖИЛЛАГАА”-гаа хойшлуулна уу

Мянга гаруй хүний амийг авч одсон коронавирусийн халдвартай дэлхий нийтээрээ тэмцэж байна. Ингэхдээ сургууль, цэцэрлэгээ түр хугацаагаар хааж, олон нийтийг хамарсан үйл ажиллагааг хориглож байна. Манай улсын Засгийн газар, Үндэсний аюулгүй байдлын зөвлөл ч цаг алдалгүй хуралдаж, холбогдох шийдвэрүүдийг гаргаж, үндэсний баяр “Цагаан сар”-ын баярыг ч өргөн хүрээнд тэмдэглэхгүй байхаар шийдвэр гаргаад байна. Эдгээр шийдвэрүүдийн үндсэн зорилго нь “иргэдийн бөөгнөрөл үүсгэхгүй байх” явдал.

Гэтэл “хамаг амьтны тусын тулд” гэх шашны байгууллага, тодруулбал, Монголын бурхан шашны төв Гандантэгчинлэн хийд “эсрэг” үйл ажиллагаанд иргэдийг уриалж байгаа нь хэр зохимжтой вэ? Тодруулбал, тус хийдийн Гадаад харилцааны ажилтан Э.Баасантогтох хэвлэлд өгсөн ярилцлагадаа “Энэ айхтар өвчнөөс сүсэгтэн олноо сэргийлэхийн тулд манай гандан өдөр болгон шахуу ном хурж байгаа. Мөн Манал, Лүйжин, ерөөлийн номуудыг дацангууд хувааж авч хурсан. Маргаашаас эхлээд манай гандангаас тусгайлан бэлтгэж хийсэн үрлийг ард түмэндээ тараана. Уг үрлийг биедээ зүүснээр маш ач тустай юм. Үрэлд есөн төрлийн эмийн түүхий эд орсноос гадна номын хүч шингээж аравнайлсан учраас элдэв өвчин, зовлон, хэл амнаас сэргийлэх зэрэг олон ач тустай. Үрэлийг улаан утсанд ороож зүүхээс гадна энгэртээ ойр байлгаж үрлийн үнэр нь өөрт аль болох үнэртэж байхаар зүүнэ. Үрэлийн үнэр тархаж байгаа газарт элдэв вирусийг устгах ач холбогдолтой. Эхний ээлжид эмч нартаа тараана” хэмээжээ.

Шашин шүтэх, шашны зан үйл үйлдэх, шашны эд зүйлсийг хэрэглэх нь иргэдийн хувийн итгэл үнэмшил, хүсэл сонирхлоор зохицуулагдах боловч халдварт өвчин тархах өндөр эрсдэлтэй энэ үед төр засгийн бодлого, хамгийн гол нь иргэдийн эрүүл мэндийн эсрэг үйлдэл болох эрсдэл байна. Учир нь Гандангаас тараах тухайн үрлийг авахаар иргэд тус хийдийг зорьж, “иргэдийн бөөгнөрөл” үүсэх боломжтой бөгөөд ингэснээр “Олон нийтийг хамарсан үйл ажиллагааг хориглосон” шийдвэр “талаар болох” юм.

Иймд тус хийдээс зохион байгуулахаар зэхсэн “үрэл тараах ажиллагаа”-нд Мэргэжлийн хяналтын байгууллага, цагдаагийн байгууллага анхаарч, зохих шаардлагыг тавьж ажиллах биз ээ. Түүнчлэн, иргэд өөрсдийн болон гэр бүлийнхнийхээ эрүүл мэндийн төлөө олон хүн цугларсан газарт очих эсэхээ шийдэх боломжтой.