Оргио үйлдвэрт гал гарч, 12 мянган дэгдээхэй шатжээ

Өнгөрсөн баасан гарагт Оргио ХХК-ийн байранд гал гарч, арав гаруй мянган дэгдээхэй шатсан байна. Тодруулбал, Налайх дүүргийн нэгдүгээр хорооны нутаг дэвсгэрт байх үйлдвэрт ийнхүү гал гарчээ. Галын улмаас 12725 дэгдээхэй шатсан байна.

Гал гарсан байр нь 4х12 метрийн хэмжээтэй бөгөөд өндөг дарах зориулалттай байр аж. Тус байрны галлагааны хэсгээс гал гарч, дотор нь байсан 12 мянга гаруй тахиа, дэгдээхэй шатаж, угаартаж үхсэн байна.

Галын дуудлага тухайн өдрийн 09:08 цагт онцгой байдлын албанд иржээ. Дуудлагын дагуу дүүргийн Онцгой байдлын хэлтсийн Гал түймэр унтраах, аврах 28 дугаар ангийн 8 алба хаагч, 2 автомашинтай 6.5 км зам туулан 09:16 цагт очиж 40 минут ажиллаж, унтраасан байна.