Шууд асууя: Төр хүүхэд, эмэгтэйчүүдээсээ мөнгө харамлаж, хувийн компанийг хулхидаж шинэ амаржих газар хаалгаа нээхгүй байна уу?

Үндэсний хөгжлийн газрын дэд дарга Б.Долгормаа:

-Нэмэлт 13 тэрбумын асуудлыг ЗГ-аар одоо шийдлээ ч мөнгө нь 2021 оны төсөвт сууна. Яагаад гэвэл 2020 оны төсөв хэдийн батлагдсан.

-Энэ барилга 10-аад жил баригдаж байна. Өмнө нь барьж байсан компанийн захирал хоригдсон. Тэр үед хэдэн төгрөг үрэгдсэн байдаг юм бол? Сая 13 тэрбум нэмэлтээр хэрэг болсон гэж байна. Хэр бодитой тоо вэ?

-13 тэрбумаар хийсэн ба хийж байгаа ажлынхаа төсөв, задаргааг ирүүлсэн. Үүнтэй нь барилгын мэргэжлийн хяналтын газраас танилцаад дүгнэлт хийсэн. Түрүүн Эрүүл мэндийн дэд сайд ч хэлсэн “Нэмэлтээр 13 тэрбумаар ажил хийгдэхгүй бол одоо байгаа эмнэлгүүдтэй адил шаардлага хангахгүй хэмжээнд хийгдэх гээд байна” гэж.

-Концессээр баригдаж байгаа учир тухайн компани нь танай газартай гэрээ байгуулсан юм байна. Танайх 2020 онд 18 тэрбумыг тусгана гэж гэрээ байгуулсан атлаа 8 тэрбумыг суулгаад 10 тэрбумыг дутуу тусгасан байна. Яагаад ийм байдал үүсэв?

-Манай байгууллага бол Сангийн яаманд 18 тэрбумаар саналаа өгсөн. Сангийн яам батлахдаа 8 тэрбум болгосон.

-Энэ эмнэлгийн нийт төсөвт өртөг нь хэд юм бэ?

-Эхлээд 25,7 тэрбум, нэмэлтээр 13 тэрбум. Нийлээд 38,7 тэрбум.