Найз бүсгүйгээ 13 давхраас шидсэн О.Боргилын гэм бурууг 13-нд шүүнэ

Өчигдөр Баянзүрх дүүргийн Эрүүгийн хэргийн анхан шатны шүүхэд хамтран амьдарч байсан найз бүсгүйгээ 13 давхраас шидсэн гэх хэрэгт буруутгагдан шүүгдэж байгаа О.Боргилд холбогдох хэргийн хурал болов.  

Тодруулбал, Баянзүрх дүүргийн Прокурорын газраас Эрүүгийн хуулийн тусгай ангийн 10.4 дүгээр зүйлийн 1 /Эд хөрөнгө, албан тушаал, гэр бүлийн хамаарал бүхий харилцаа, бусад нөхцөл байдлын улмаас эрхшээлдээ байгаа хүнийг байнга хүчирхийлсэн, доромжилсон, зодсон, тамлан зовоосон, айлган сүрдүүлсний улмаас амиа хорлоход гарцаагүй хүргэсэн/, 11.6 дугаар зүйлийн 2 дахь хэсэгт зааснаар /Энэ гэмт хэргийг энэ хуулийн 10.1 дүгээр зүйлийн 2 дахь хэсэгт заасан хүндрүүлэх нөхцөл байдалтайгаар үйлдсэн/, 11.7.1 дүгээр зүйлийн 1 дэхь хэсгийн 1.1 /зодсон /-д тус тус зааснаар яллах дүгнэлт үйлдэн ирүүлсэн О.Боргилд холбогдох эрүүгийн хэргийг Баянзүрх дүүргийн Эрүүгийн хэргийн анхан шатны шүүх хүлээн авч хянасан байна. Улмаар шүүгдэгчийн өмгөөлөгчийн хүсэлтээр урьдчилсан хэлэлцүүлгийн шүүх хуралдааныг өчигдөр  буюу /2020-02-03-ны өдөр/ явууллаа. Шүүхээс яллагдагчийг шүүхэд шилжүүлж, гэм буруугийн шүүх хуралдааныг 2020 оны хоёрдугаар сарын 13 өдрийн 10:00 цагт хийхээр товложээ.

Хэргийг эргэн сануулбал, 2019 оны дөрөвдүгээр сарын 9-10-нд шилжих шөнө Баянзүрх дүүргийн нутаг дэвсгэрт байрлах “Мандала” хотхоны 13 давхараас 22 настай Ц унаж учир битүүлгээр амь насаа алдсан хэрэг гарсан байдаг. Энэхүү хэргийг О.Боргилыг үйлдсэн хэмээн мөрдөн шалгах үеэр сэжиглэн цагдан хорьсон ч долдугаар сард батлан даалтаар сулласан билээ.