С.Амарсайхан: Коронавирусээс урьдчилан сэргийлэх ажилд нийслэлээс 500-600 сая төгрөгийн төсөв гаргана

-Нийслэлд цагаан сарыг тэмдэглэх талаар юу гэж яригдсан бэ?

-Цагаан сарыг төрийн золголтоос эхлээд нутгийн зөвлөлүүдийн золголт болон бөх барилдах гэх мэт олон нийтийн арга хэмжээг хийхгүй гэсэн шийдвэр гарч байна.

-Нийслэлийн хэмжээнд коронавирустэй холбоотой яригдаж байгаа хурц сэдэв юу байна вэ?

-Нийслэлийн хэмжээнд урьдчилан сэргийлэх, зохион байгуулалтын, хяналт шалгалтын гэсэн гурван ажлыг хийж байна. Эндээс хамгийн гол нь урьдчилан сэргийлэх арга хэмжээ. Хоёрдугаарт, гаргаж байгаа шийдвэрүүдийн биелэлтийг хангах, иргэдэд эрүүл мэндийн болон бусад үнэ зөв мэдээллийг цаг алдалгүй хүргэх гэсэн асуудлууд яригдаж байна. Тэгээд Улсын онцгой комиссоос сая ярьсан гурван ажлын хүрээнд ажлаа зохион байгуулах, мэргэжлийн чиг үүргийг байгууллагууд өөрийн ажлаа зохион байгуулж явуулах гэсэн ажлууд хийгдэж байна.

-Нэмж хөл хорио цээрийн дэглэм тогтоох асуудал яригдсан уу?

-Нэмж хорио цээрийн дэглэм оруулах, хориглох гэх мэт зүйл байхгүй. Одоо авч байгаа арга хэмжээнүүдээ хэвийн явуулах, бас хүүхэд багачуудын сургалтыг тв, интернэтээр явуулах, сургалтын хөтөлбөрийг тасалдуулахгүй байх дээр, гэртээ байгаа хүүхдүүдийн аюулгүй байдлыг хангах зөвлөмж зөвлөгөөг аав, нарт өгөх гэсэн ажил хийгдэж байна.

-Нийслэлчүүд айдасгүй байж болох уу? Илэрсэн юм биш үү гээд мэдээлэлд үл итгэсэн байдал гарч байна.

-Бид ЗГ-аас өгсөн үүрэг, чиглэлийн дагуу ЭМЯ, мэргэжлийн байгууллагуудын мэдээлэл дээр тулгуурлаж иргэддээ мэдээллийг өгч байгаа. Өнөөдрийн байдлаар МУ-д албан ёсоор шинэ төрлийн вирус илэрсэн зүйл ер алга байна.

-Тусгаарласан хүмүүсийн талаар?

-Тусгаарласан хүмүүсээс вирус илэрсэн зүйл байхгүй. Гэхдээ энэ вирус өргөн хүрээтэй олон газар дэгдэж байгаа учраас оргил үе нь хэдийд болох талаар, түүнд шаардлагатай урьдчилан сэргийлэх арга хэмжээний талаар яригдсан. Мөн голомтод ажиллах мэргэжлийн байгууллагын ажилтнуудын хамгаалах хэрэсглийг бэлдэх талаар яригдсан.

-Нийслэлээс хэдий хэмжээний төсөв гаргах вэ?

-Нийслэлээс шаардлагатай төсвийг гаргаад явж байгаа. Цаашдаа ч шаардлагатай төсвийг гаргана. Улсын онцгой комисс, ЗГ-аас хөрөнгийн асуудлыг шийдэж өгсөн. Яг хэдий хэр хөрөнгө вэ гэдгийг хэлэх боломжгүй байна. Нийслэлээс урьдчилан сэргийлэх байдлыг хангахад 500-600 сая төгрөг гарна гэж урьдчилсан тооцоо гарсан. Ингэлээ гээд бүгдийг нь өнөөдөр гаргачхаж байгаа юм биш. Нийслэл ЭМГ 22 заалт бүхий төлөвлөгөө гаргаад хэрэгжүүлж байгаа.

-Та Засаг даргын хувьд Цагаан сарын талаар ямар байр суурьтай байна вэ?

-Ийм үед эрсдэлийг багасгах нь зүйтэй. Тэгэхээр хурал зөвлөгөөнийг цөөлөх, олон нийтийн баяр ёслолыг хийхгүй байх зэргээр эрсдэлийг багасгах нь зүйтэй гэж бодож байна.