Т.Алтанцэцэг эмч зулбуулах тариа ашиглан таван сартай ургийг хөнджээ

Баянзүрх дүүргийн 21 –р хорооны “Ачит сайхан” өрхийн эрүүл мэндийн төвийн эмч Т.Алтанцэцэг 19 настай эмэгтэйд үр хөндөлт хийсний улмаас эхийн биед хүндрэл гарч, ЭХЭМҮТ-д хүргэгдсэн талаар бид мэдээлсэн.

Тодруулбал, 19 настай иргэн Э нэгдүгээр сарын 23-ны өдрийн 17.00 цагийн үед Т.Алтанцэцэг эмчтэй уулзаж, эмэгтэйчүүдийн үзлэгт орсон  бөгөөд Т.Алтанцэцэг эмч “18-19 долоо хоногтой жирэмслэлт” хэмээн оношлоод,  эмээр үр хөндөлт хийхээр эхний тунг үтрээнд тарьсан байна.

Түүний маргааш буюу нэгдүгээр сарын 24-ны өдрийн 14 цагт ургийг зулбуулах үеэр хүндрэл үүсэж,   ЭХЭМҮТ-ийн Эх барих, эмэгтэйчүүдийн эмнэлгийн яаралтай тусламжийн тасагт хүргэгдсэн байна. Ингэхдээ хожуу үеийн үр хөндөлт /270 гр ураг/ цус алдалт, умай урагдсан оношоор хэвтүүлэн эмчилж, амь насыг нь аварчээ.